ईव्हीएम घोळाचे शनिवारी प्रात्यक्षिक

म. टा. प्रतिनिधी, जळगाव

मनपा निवडणुकीत अधिकाऱ्यांच्या संगनमताने ईव्हीएममध्ये घोटाळा केल्याचा आरोप करीत खळबळ उडवून देणाऱ्या अमरावती येथील मदन शेळके शनिवारी (दि. ११) जळगावात येऊन घोळाचे प्रात्यक्षिक दाखविणार असल्याची माहिती दिली आहे.

जळगाव महापालिका निवडणुकीमध्ये ईव्हीएममध्ये घोटाळा करून प्रशासनातील अधिकाऱ्यांनी आपल्या पसंतीच्या उमेदवारांना विजयी घोषित केल्याचा धक्कादायक आरोप शेळके यांनी केला होता. प्रमुख राजकीय पक्षांच्या नेत्यांनी व मुख्य निवडणूक निर्णय अधिकाऱ्यांनी शेळकेंचे आरोप फेटाळले आहेत. तरी राष्ट्रवादीच्या काही पदाधिकाऱ्यांनी व पराभूत उमेदवारांनी शेळके यांची अमरावती येथे जाऊन भेट घेतली. यात मंगला पाटील, राजू मोरे, स्वप्नील नेमाडे, मिलींद सोनवणे यांच्यासह काही इतर पक्षाचे पदाधिकारीदेखील गेले होते. या वेळी त्यांना ईव्हीएममधील घोळाबाबत प्रात्यक्षिक दाखविण्यात आल्याचेही शेळके यांनी सांगितले. या प्रकरणी न्यायालयातदेखील जाण्याचा इशारा त्यांनी दिला आहे. शनिवारी जळगावात येणार असून, राष्ट्रवादी काँग्रेस, काँग्रेस व शिवसेनेच्या पदाधिकाऱ्यांसमोर कशाप्रकारे ईव्हीएममध्ये घोळ करण्यात आला आहे. याचे प्रात्यक्षिक दाखवून कशाप्रकारे घोटाळा केला आहे हे जाहीर केले जाईल, असा दावादेखील शेळके यांनी केला आहे.