कृषी नायकांचे ‘फली संमेलन’ आजपासून

दोन टप्प्यात आयोजन; महाराष्ट्र, गुजरातमधील ५२५ विद्यार्थी

म. टा. प्रतिनिधी, जळगाव

जैन इरिगेशन सिस्टीम्स्‌ लि. व नॅन्सी बेरी फाउंडेशन ‘अॅक्शन प्लॅटफॉर्म’ च्यावतीने आयोजित भारताच्या कृषी क्षेत्रातील भविष्य दर्शी नायकांचे चौथे संमेलन (फ्युचर अॅग्रीकल्चर लिडर्स ऑफ इंडिया) ‘फली संमेलन-२०१८’ चे आयोजन केले आहे. यावर्षी विद्यार्थ्यांच्या उत्स्फूर्त प्रतिसादामुळे दोन टप्प्यात हा कार्यक्रम होईल. दि. २० ते २१ आणि २३ ते २४ एप्रिल रोजी जैन हिल्स येथे पार पडेल. यात महाराष्ट्र आणि गुजरात राज्यामधील ७५ शाळांच्या ६१५० विद्यार्थ्यांपैकी ५२५ विद्यार्थ्यांची संमेलनासाठी निवड करण्यात आली आहे.

भविष्यातील शेतीसाठी शालेय शिक्षणापासून उच्च कृषी तंत्रज्ञानाचे बाळकडू येणाऱ्या पिढीला मिळावे यासाठी जैन इगिरेशन आणि नॅन्सी बेरी फाउंडेशन यांच्या वतीने ‘फली’ हा उपक्रम २०१४ पासून राबविण्यात येत आहे. या उपक्रमाद्वारे महाराष्ट्र आणि गुजरातमधील ७५ शाळांतील ६१५० विद्यार्थ्यांना शेती व शेतीसंबंधित व्यवसायात यशस्वी होण्यासाठी खास प्रशिक्षण दिले जाणार आहे. यासाठी ॲक्शन प्लॅटफॉर्मने उच्च विद्याविभूषित कृषी प्रशिक्षक नेमलेले आहेत. ‘फली’ उपक्रमाचा महाराष्ट्रात आणि गुजरातमध्ये पुढील शैक्षणिक वर्षापासून अधिक विस्तार होईल आणि हा उपक्रम लवकरच राष्ट्रीय उपक्रम व्हावा यासाठी प्रयत्न केले जात असल्याचे ‘फली’च्या समन्वय नॅन्सी बेरी यांनी ‘मटा’शी बोलताना सांगितले.

शेतीची आवड आणि व्यवहारिक ज्ञान
‘फली’ या उपक्रमात इयत्ता आठवी व नववी मधील विद्यार्थ्यांचा समावेश असतो. विद्यार्थ्यांना शेतीचे प्रात्याक्षिकांसह शिक्षण मिळावे यासाठी जैन इरिगेशनेतर्फे प्रत्येक शाळेत ग्रीनहाऊस व शेड हाऊसची उभारणी करून दिली आहे. विद्यार्थ्यांना केवळ व्याख्यान दिले जात नाही. तर त्यांना शेतीतील अडचणी आणि त्यावर उपाय योजनांबाबत तसेच कृषी अर्थशास्त्राचे व्यवहारीक शिक्षण दिले जाते. सर्व ‘फली’ विद्यार्थी शेती व्यवसायाच्या भविष्यकालीन योजना तयार करतात. विद्यार्थ्योंनी तयार केलेले कृषी विषयक मॉडेल व सादरीकरण यांची स्पर्धा घेतली जाते.

असे असतील कार्यक्रम...
या नावीन्यपूर्ण संमेलनात पहिल्या भागात ‘फली’ उपक्रमातील विद्यार्थी आज (दि. २०) जैन इरिगेशनच्या जैन शेती संशोधन आणि विकास केंद्र, टिश्यूकल्चर प्रयोगशाळा, फळप्रक्रिया विभाग यासारख्या विविध आस्थापनांना भेटी देतील. तसेच ते जैन इरिगेशनचे उच्च कृषी तंत्रज्ञान वापरणाऱ्या प्रगतीशील शेतकऱ्यांना भेटून त्यांच्याशी चर्चा करतील. यानंतर शनिवारी (दि. २१) ‘फली’च्या दुसऱ्या दिवशी विद्यार्थी ७५ शेती व्यवसाय योजना आणि ७५ नावीन्यपूर्ण उपकरणांच्या उपक्रमांचे सादरीकरण करतील. यात ते शेती व्यवसाय योजनेचे साहित्य, प्रक्रिया आणि गटाची माहिती देतील. यात विजयी झालेल्यांना समारोप सत्रात मान्यवरांच्या हस्ते पारितोषिक देऊन गौरविण्यात येईल.