भीषण घटना... शेतात काम करताना सासऱ्यांच्या डोळ्यादेखत जावयाला ट्रॅक्टरने उडवले

जळगाव : जळगाव तालुक्यातील आव्हाणे येथे शेतात रोटोव्हेटर करत असलेल्या ट्रॅक्टरवरील चालकाचे नियंत्रण सुटून झालेल्या अपघातात शेतात काम करणारा शेतमजूर जखमी झाल्याची घटना दोन दिवसांपूर्वी २५ मे रोजी घडली होती. उपचार सुरू असताना ४ जूनला या शेतमजुराचा मृत्यू झाला आहे. बाळू दयाराम देवरे वय ३२ रा. आव्हाणे ता. जळगाव असे मयताचे नाव आहे. याप्रकरणी रविवारी २६ जूनला ट्रॅक्टर चालकाविरोधात सदोष मनुष्यवधाचा गुन्हा तालुका पोलिसात दाखल करण्यात आला आहे. या घटनेवेळी मृत बाळू देवरे यांचेही सासरे आणि मेव्हणे शेतात काम करत होते. त्यांच्या डोळ्यादेखतच ही दुर्देवी घटना घडली होती.

भडगाव तालुक्यातील रहिवासी बाळू देवरे हे कामानिमित्ताने त्यांचे सासर असलेल्या जळगाव तालुक्यातील आव्हाणे गावात राहत होते. पत्नी एक मुलगा असा त्यांचा परिवार आहे. गावातील शेतकरी विजय शामराव पाटील यांच्या शेतात ते कामाला होते. याच शेतात बाळू देवेर यांचे सासरे गौतम साबळे हे सुद्धा मजुरीने काम करतात. २५ मे रोजी सकाळी विजय पाटील यांच्या शेतात ट्रॅक्टरद्वारे रोटोव्हेटरचे काम सुरू होते. तर बाळू देवरे यांचे सासरे गौतम साबळे हे व त्यांचा मुलगा याच शेतात बांधावर काटेरी झाडे झुडपे तोडण्याचे काम करत होते. तर बाळू देवरे हे या सुरू असलेल्या रोटोव्हेटरवर देखरेखीचे काम करत होते.

दरम्यान, ट्रॅक्टरवरील चालकाचे नियंत्रण सुटले आणि भरधाव ट्रॅक्टरने बाळू देवरे यांना जोरदार धडक दिली. या अपघातात बाळू देवरे यांचा पाय कापला गेला होता. त्यांना उपचारार्थ जिल्हा रुग्णालयात दाखल करण्यात आले होते. उपचार सुरू असतांना ४ जूनला सकाळी साडेसात वाजेच्या सुमारास बाळू देवरे यांचा मृत्यू झाला. मृत बाळू देवरे यांच्या पश्चात पत्नी मनीषा व मुलगा चेतन (वय ९ वर्ष) असा परिवार आहे.

शेतात काम करताना काळ कोसळला, वीज पडून तिघांचा जागीच मृत्यू

बाळू देवरे यांच्या अंत्यविधी आणि उत्तरक्रीयेचा कार्यक्रम आटोपून २६ जूनला त्यांचे सासरे गौतम साबळे यांनी अपघाताप्रकरणी तालुका पोलिसात तक्रार दिली. त्यानुसार अपघातास कारणीभूत ट्रॅक्टरवरील चालक आधार बाबुलाल लोंढवे (ता. अमळनेर) याच्या विरोधात सदोष मनुष्यवधाचा गुन्हा दाखल करण्यात आला आहे. पुढील तपास पोलीस हेडकॉन्स्टेबल विश्वनाथ गायकवाड करीत आहेत, अशी माहिती तालुका पोलिसांनी दिली.

सैराट रिपीट! प्रेमविवाह केल्याने जोडप्याला सळईने मारहाण, जीवे मारण्याची धमकी