जळगावात दुसऱ्या दिवशीही पावसाची जोर‘धार’ हजेरी

अनेक भागांत नागरिकांची तारांबळ

म. टा. प्रतिनिधी, जळगाव

शहरात काल सायंकाळी झालेल्या जोरदार पावसानंतर गुरुवारी (दि. २७) सायंकाळीदेखील वादळी वारे व विजांचा कडकडाट पंधरा मिनिटे पावसाच्या सरी कोसळल्यात. अचानक झालेल्या या पावसामुळे बाजारपेठेत वाहनधारकांची चांगलीच त्रेधातिरपीट उडाली होती.

महिनाभरापासून जळगावकरांना हुलकावणी देणाऱ्या पावसाने बुधवारी जळगाव शहरात सायंकाळी साडेसहा वाजता जोरदार हजेरी लावली होती. सुमारे तासभर झालेल्या या वादळी पावसाने अवघे शहर चिंब केले होते. शहरातील सखल भागात पाणी साचले होते. बुधवारी रात्री पावसाचे वातावरण झाले. मात्र, पाऊस झाला नाही. रात्री पाऊस झाल्याने गुरुवारी सकाळपासून वातावरणात कमालीचा उकाडा निर्माण झाला होता. त्यामुळे जळगावकर हैराण झाले होते.

शहरात पुन्हा गुरुवारी सायंकाळी साडेपाच वाजता शहरात वादळी वाऱ्यांना सुरुवात झाली. त्यापाठोपाठ आकाशात विजांचा कडकडाट सुरू झाल्यानंतर पावसाला सुरुवात झाली. सुरवातीला मुसळधार असलेला पाऊस पंधरा मिनिटाची हजेरी देवून पुन्हा गडप झाला. या पंधरा मिनिटांत जळगावातील मुख्य बाजारपेठेत विक्रेते, ग्राहक व वाहनधारकांची चांगलीच तारांबळ उडाली होती. आसरा शोधण्यासाठी नागरिकांना कसरत करावी लागत होती. पंधरा मिनिटांच्या पावासानंतर काहीवेळ वातावरणात गारवा निर्माण झाल्याने जळगावकरांना दिलासा मिळाला. रात्री सव्वाआठ वाजेच्या सुमारास पावसाला सुरुवात झाली होती.