कर्जमाफी योजनेंतर्गत आजपासून नोंदणी

म. टा. प्रतिनिधी, जळगाव

छत्रपती शिवाजी महाराज शेतकरी सन्मान योजना अर्थात शेतकरी कर्जमाफी योजनेच्या अर्ज नोंदणीस आज (दि. २४) सुरुवात होत आहे. या योजनेच्या प्रभावी अंमलबजावणीसाठी नुकतीच संबंधित यंत्रणेच्या अधिकाऱ्यांची बैठक जिल्हाधिकारी किशोरराजे निंबाळकर यांच्या अध्यक्षतेखाली पार पडली.

कर्जमाफी योजनेंतर्गत करावयाच्या अर्जाचा नमूना जाहिरात स्वरुपात वृत्तपत्रातून प्रसिद्ध करण्यात आलेला आहे. कर्जमाफी योजनेचा लाभ घेण्यासाठी ऑनलाइन पद्धतीने अर्ज भरावयाचा असून, अर्ज भरताना शेतकऱ्यांनी आपले आधार कार्ड सोबत घेऊन जाणे आवश्यक आहे. आधार कार्ड क्रमांक नसेल परंतु त्यांनी नोंदणी केली असेल तो नोंदणी क्रमांक घेऊन जाणे आवश्यक आहे, असेही प्रशासनाने कळवले आहे.

ऑनलाईन अर्ज भरण्यासाठी जिल्ह्यात महाऑनलाइनची १७७, सी. एस. सी. एस. पी. व्ही. ची ७०० तर आपले सरकार वेब पोर्टलची ८६९ केंद्रे उपलब्ध केली आहेत. कर्जमाफी अर्ज ऑनलाइन भरण्यासाठी कोणतेही शुल्क आकारण्यात येणार नाही, अशी माहिती जिल्हाधिकाऱ्यांनी बैठकीत दिली. अर्ज भरण्यासाठी आधार कार्ड आवश्यक असले तरी ज्यांच्याकडे आधार कार्ड नाही त्यांनाही अर्ज दाखल करता येणार आहे. परंतु, त्यांना आधार कार्ड काढून बँक सीडिंग केल्याशिवाय या योजनेचा लाभ मिळणार नसल्याचेही या बैठकीत सांगण्यात आले.