२५ कोटींचा तिढा सुटला

पाणीपुरवठा, गटारींच्या कामांवर आमदार भोळे व महापौरांचे एकमत

म. टा. प्रतिनिधी, जळगाव

महापालिकेला मुख्यमंत्री देवेंद्र फडणवीसांनी शहराच्या विकास कामांसाठी २५ कोटी रुपयांचा निधी मंजूर केला आहे. या निधीतून करण्याच्या कामांबाबत भाजप व मनपा सत्ताधारी खान्देश विकास आघाडीत बरेच मतभेद झाले होते. त्यामुळे निधी कित्येक दिवसांपासून अखर्चित पडला होता. अखेर शनिवारी (दि. २३) जिल्हाधिकारी किशोरराजे निंबाळकर यांच्या उपस्थितीत महापौर ललित कोल्हे व आमदार सुरेश भोळे यांच्यासमक्ष निधीतून करण्याची कामे निश्चित करण्यात आली. त्यामुळे आता या निधीतून होणाऱ्या विकासकामांना अखेर मुहूर्त मिळणार असून, २५ कोटींचा तिढा सुटला आहे.

मुख्यमंत्री देवेंद्र फडणवीस यांनी जळगाव महापालिकेची आर्थिक परिस्थिती बिकट असल्याने मुलभूत सुविधांची कामे करण्यासाठी २५ कोटी रुपयांच्या निधीची घोषणा केली होती. पाठपुरावा केल्यानंतर या निधीची बजेटमध्ये तरतुद करून निधी मंजूर करण्यात आला. त्यानंतर या निधीतील कामांवरून सत्ताधारी खान्देश विकास आघाडी व विरोधी गट भाजपमध्ये मतभेद झाले होते. पाणीपुरवठा योजनेसाठी रस्ते खोदले जाणार असल्याने या कामांतून रस्त्यांची कामे करू नये, असे आदेश सरकारने दिले होते.

या निधीतून विकासकामे करण्यासाठी पालकमंत्री चंद्रकांत पाटील यांच्या अध्यक्षतेखाली समिती गठित करण्यात आली होती. त्यानुसार २५ कोटींतून १० कोटीचे एलईडी पथदिवे, ७ कोटी रुपयांची गटार, शहरातील नाल्यांच्या संरक्षण भिंतीसाठी ५ कोटी तर शहरात भूमिगत वीजवाहिनींसाठी ३ कोटी असे विभाजन करण्यात आले होते. मात्र, त्यावरही एकमत झाले नाही. अखेर या निधीतून करायच्या कामांबाबत शनिवारी (दि. २३) बैठक झाली. यावेळी जिल्हाधिकारी किशोर राजे निंबाळकर, आमदार सुरेश भोळे, महापौर ललित कोल्हे, माजी महापौर नितीन लढ्ढा, सुनील महाजन, भाजप गटनेते सुनील माळी, नितीन बरडे, सहाय्यक उपायुक्त लक्ष्मीकांत कहार, शहर अभियंता बी. डी. दाभाडे, सुनील भोळे, डी. एस. खडके व वीज अभियंते उपस्थित होते. यावेळी निधीतून करावयाची कामे एकमताने निश्चित करण्यात आले. साथ रोग

जळगावात सकाळी छत्रपती शाहू रुग्णालयातील मलेरिया विभागात साथ रोग नियंत्रणासाठी ११ विभागप्रमुख व ८२ कर्मचारी उपस्थित होते. महापौर कोल्हे, नगरसेवक अनंत जोशी यांच्या उपस्थित सकाळपासून सर्व प्रभागात अबे‌टिंग व फवारणीचे कामे सुरू करण्यात आली आहेत, अशी माहितीही प्रशासनाने दिली आहे. ​ ही कामे मनपाने की सार्वजनिक बांधकाम विभागाने करावी? याबाबतचा तिढा कायम होता. हा सुटण्यापूर्वीच २५ कोटी रुपयांची रक्कम महापालिकेकडे वर्ग करण्यात आली होती. त्यानंतर मनपा पदाधिकारी या निधीतून जुनी कर्ज फेडण्याची भीती व्यक्त करीत आमदार भोळे यांनी निधीतील कामे बांधकाम विभागाकडून करण्याची मागणी केली होती. त्यानुसार निधी पुन्हा मनपाकडे वळविण्यात आला होता.


नियंत्रणाचे काम सुरू

शहरात साथ रोगांचा फैलाव सुरू आहे. त्यामुळे मनपा प्रशासनाने तातडीने ८ फॉगिंग (फवारणी) मशिन खरेदी केल्या आहेत. या मशिन शनिवारी दाखल झाल्या असून, त्यांचा शुभारंभ जिल्हाधिकारी कार्यालयातच आमदार सुरेश भोळे यांच्या हस्ते करण्यात आला.