जळगावकरांचा ‘संगीत संशेवकल्लोळ’ भावला

म. टा. प्रतिनिधी, जळगाव

स्व. वसंतराव चांदोरकर स्मृती प्रतिष्ठान व महालक्ष्मी प्रॉडक्शन (मुंबई) यांच्यातर्फे दोन अंकी फुल कॉमेडी नाटक असलेल्या संशेवकल्लोळ या व्यावसायिक नाटकाचा जिल्हाधिकारी किशोर राजे निंबाळकर यांच्या हस्ते तिसरी घंटा वाजवून शुभारंभ करण्यात आला.

वसंतराव चांदोरकर प्रतिष्ठान व महालक्ष्मी प्रॉडक्शन आयोजित संशेवकल्लोळ या दोन अंकी नाटकाचा पहिला प्रयोग भैय्यासाहेब गंधे सभागृहात शनिवारी (दि. २७) सादर करण्यात आला. या वेळी जिल्हा पोलिस अधीक्षक दत्तात्रय कराळे, आयुक्त जीवन सोनवणे, लेखक व दिग्दर्शक डॉ. हेमंत कुलकर्णी, दीपक चांदोरकर, अरविंद देशपांडे उपस्थित होते.

खान्देशात प्रथमच दोन अंकी कॉमेडी संशेवकल्लोळ या व्यावसायिक नाटकाची निर्मिती करण्यात आली. राज्यभरात नाटकाचे प्रयोग केले जाणार आहेत. नाटकाच्या सुरुवातीपासूनच अखेर पर्यंत उपस्थित रसिक हास्य कल्लोळात खिळून होते.

या दोन अंकी नाट्यप्रयोगाचे लेखक व दिग्दर्शक - डॉ. हेमंत कुळकर्णी यांनी केले. संगीत - दुष्यंत जोशी, संगीत साथ - ज्युईली कलभंडे, ढोलकी साथ - उल्हास ठाकरे, ध्वनिमुद्रण - अप्पा नेवे, नृत्य - सागर सोनवणे, रंगभूषा - प्रियंका वाणी, वेशभूषा - दीपक भुसारी, ध्वनीसंकेत - भावेश पाटील, जाहिरात - योगेश शुक्ल, निर्मिती सहाय्य - धनंजय धनगर, योगेश बेलदार, सूत्रधार म्हणून दिपक चांदोरकर, राजेंद्र पाटणकर यांनी काम पाहिले. तर नाटकातील कलावंत राजा - किरण अडकमोल, राणी - आरती गोळीवाले, प्रधान - दिनेश माळी, शिपाई - बळवंत गायकवाड, शाहीर - विशाल जाधव, सगुणा म्हणून अपूर्वा कुळकर्णी यांनी भूमिका केली.