सर्पमित्र संमेलनासाठी रविवारी बैठक

म. टा. प्रतिनिधी, जळगाव

पहिल्या महाराष्ट्र सर्पमित्र संमेलनाच्या यशस्वी नियोजनासाठी रविवारी (दि. ४) सकाळी ११ वाजता विवेकानंद प्रतिष्ठानच्या सावखेडा शिवारातील शानभाग विद्यालयात राज्यातील प्रतिनिधींची बैठक होणार आहे.

या बैठकीस महाराष्ट्रातील सर्प अभ्यासक अनिलकुमार खैरे, केदार भिडे, नाना भुतकर, गणेश मेहंदळे, शार्दुल वारंगे, राहुल कांबळे यांच्यासह निमंत्रित १०० सभासद आणि संस्थाचे प्रतिनिधी उपस्थित राहणार असल्याची माहिती संमेलनाचे संयोजक बाळकृष्ण देवरे यांनी दिली. महाराष्ट्रातील सर्व जिल्ह्यांना व तेथील सरीसृप, वन्यजीव, क्षेत्रात कार्य करणाऱ्या संस्थांना सामील करून यशस्वी होणारे हे पहिलेच संमेलन असेल. आतापर्यंत २० जिल्ह्यातील सर्प अभ्यासक, आणि संस्था प्रतिनिधी यांनी उपस्थित राहण्याबद्दल नावनोंदणी केली आहे, अशी माहितीही संस्थेचे अध्यक्ष वासुदेव वाढे यांनी दिली.

वन्यजीव संरक्षण संस्थेतर्फे गेल्या वर्षभरापासून संमेलनाची तयारी सुरू आहे. यात विविध समित्या नेमण्यात आल्या आहेत, असे निमंत्रक रवींद्र सोनवणे यांनी सांगितले. संमेलनाचा आराखडा तयार करण्याचे अंतिम टप्यात आले असून या बैठकीत याला पूर्ण रूप देण्यात येईल, असे तांत्रिक विभागप्रमुख अमन गुजर यांनी सांगितले. संमेलन पूर्व बैठकीच्या यशस्वीतेसाठी, उत्तर महाराष्ट्र विद्यापीठ, विवेकानंद प्रतिष्ठान शानभाग विद्यालय, तसेच सिनेट सदस्य अरुण सपकाळे, राहुल सोनवणे, योगेश गालफाडे, अमोल देशमुख आदी परिश्रम घेत आहे.