शिळ्या अन्नातून विषबाधा

म. टा. प्रतिनिधी, जळगाव

सुप्रीम कॉलनीत शिळे अन्न खाल्ल्याने सहा बालकांसह दोन महिलांना विषबाधा झाल्याची घटना गुरूवारी घडली. त्यांच्यावर सिव्हिल हॉस्पिटलमध्ये उपचार सुरू आहेत.

सुप्रीम कॉलनीतील आसिफ मिस्तरी यांच्या घरी बुधवारी नातेवाईक होते. यावेळी तयार केलेले अन्न आसिफ यांनी घरातच ठेवले, तर काही कामगारांना वाटून दिले. गुरूवारी सकाळी ते कामावर गेले. नातेवाईकांनी उरलेला शिळा शिरा मुलांना खाण्यास दिला. दुपारी या मुलांना व दोन महिलांना उलट्यांचा त्रास जाणवू लागला. मुलांसह महिलांना तातडीने जिल्हा रुग्णालयात दाखल करण्यात आले. अदनाम शेख नूर (४), अझर रफा शेख मौसीन (३), नाझमिन शेख खालीद (२), महेक शेख आसीफ (२), अलफिया शेख शकील (३), सावित्री प्रितमसिंग राठोड (४०), रहिमा बी शेख रशीद (४५), अलिया शकील पटेल (३) यांना रुग्णालयात दाखल केले गेले आहे.