सातपुड्याच्या कुशीत वन महोत्सव

रावेर : तालुक्यातील सातपुड्याच्या गतवैभवासाठी महाराष्ट्र सरकारच्या 'एकच लक्ष चार कोटी वृक्ष' या मोहिमेत वृक्ष लागवड करण्यासाठी लोकचळवळ उभी राहिली असून, रावेर तालुक्यात या सप्ताहात ५ लक्ष वृक्ष लागवड होणार आहे. आदिवासी गावांमध्ये आगामी काळात अनेक विकासात्मक योजना राबविण्यात येणार असल्याचे आमदार हरिभाऊ जावळे यांनी गारबर्दी परिसरात वनमहोत्सव शुभारंभप्रसंगी सांगितले.

रावेर तालुक्यात वृक्षलागवड सप्ताहास शनिवारी प्रारंभ झाला असून, कार्यक्रमास माजी शिक्षण व आरोग्य सभापती सुरेश धनके, पद्माकर महाजन, माधुरी नेमाडे, अनिता चौधरी, उपवनसंरक्षक संजय दहिवले, प्रशिक्षण केंद्राचे संचालक के. बी. भवर, उपसंचालक, एल. बी. राणे, व्ही. डी. कुलकर्णी, उप वनसंरक्षक अश्विनी खोपडे, सहाय्यक वनसंरक्षक आर. एस. भवर आदी मान्यवर उपस्थित होते. सुरुवातीला कृषी दिनानिमित्त माजी मुख्यमंत्री दिवंगत वसंतराव नाईक यांच्या प्रतिमेचे व रोपांचे पूजन करण्यात आले.

प्रास्ताविकात वन परिक्षेत्र अधिकारी राजेंद्र राणे यांनी तालुक्यातील रोपवाटिका आणि वृक्षलागवड मोहिमेबाबत

आराखडा सादर केला. कार्यक्रमाचे सूत्रसंचालन दीपक नगरे यांनी केले तर आभार वनपाल विकास सोनवणे यांनी मानले.