'स्वाइन फ्लू'मुळे वनरक्षकाचा मृत्यू

चाळीसगाव : वन विभागातील वनरक्षक व शहरातील हिरापुर रोड भागातील रहिवाशी नितीन अमरसिंग चव्हाण यांना स्वाइन फ्लूची लागण झाली होती. त्यांचा औरंगाबाद येथे उपचारादरम्यान मृत्यू झाला. वनविभागात वनरक्षक म्हणून नोकरीस असलेले व हिरापूर रस्त्यावरील नवीन नाका परिसरातील रहिवाशी यांना तीन आठवड्यांपूर्वी खोकल्याचा त्रास होऊ लागला होता.

त्रास वाढल्यानंतर त्यांना शहरातील खासगी रुग्णालयात दाखल करण्यात आले. त्यांच्या तपासण्या करण्यात आल्यानंतर त्यांना स्वाइन फ्लुची लागण झाल्याचे निष्पन्न झाले. त्यानंतर त्यांना उपचारासाठी औरंगाबाद येथील एमआयटी रुग्णालयात हलविण्यात आले होते. त्यांचे रविवारी निधन झाले. नितीन चव्हाण यांच्या पश्चात वडील, पत्नी व तीन मुले असा परिवार आहे.