माजी आमदार शरद वाणी यांचे निधन

जळगाव ः विधान परिषदेचे माजी सदस्य अॅड. शरद सोनू वाणी (वय ७७) यांचे मंगळवारी (दि. १०) सायंकाळी साडेसहा वाजता नवीपेठेतील राहत्या घरीच हृदयविकाराने निधन झाले. त्यांच्यावर बुधवारी वैकुंठधाम येथे शोकाकुल वातावरणात अंत्यसंस्कार करण्यात आले. यावेळी जळगाव शहर व जिल्ह्यातील मान्यवरांची उपस्थिती होती.

वाणी हे १९९२ ते २००४ या कालावधीत दोनवेळा विधान परिषदेवर निवडून आले होते. तसेच तत्कालीन नगरपालिकेवर उपनगराध्यक्ष म्हणूनही निवडून आले होते. माजी मंत्री सुरेश जैन यांचे ते घनिष्ठ मित्र होते. निधनाची वार्ता समजताच सुरेश जैन यांनी तातडीने नवीपेठेतील त्यांच्या घरी जाऊन वाणी यांच्या कुटुंबीयांचे सांत्वन केले. शरद वाणी यांच्या पश्चात पत्नी शारदा, मुलगे शैलेश, चंद्रशेखर व मुलगी रोहिणी असा परिवार आहे.