तोतया उपजिल्हाधिकारी पोलिसांच्या ताब्यात

म. टा. प्रतिनिधी, जळगाव

उपजिल्हाधिकारी असल्याचे भासवून कौटुंबिक वाद निपटविण्यासाठी आलेल्या तोतया उपजिल्हाधिकाऱ्याचा बनाव गुरूवारी (दि. २०) दुपारी उघड झाला. डीवायएसपी सचिन सांगळे यांच्या सतर्कतेने तोतया उपजिल्हाधिकाऱ्याला जिल्हा पेठ पोलिसांनी ताब्यात घेतले. त्याच्यासोबत असलेल्या महिलेस पोलिसांनी ताब्यात घेतले आहे.

पती-पत्नीचा वाद जिल्हा पोलिस कार्यालयातील महिला सहाय्य कक्षात आल्यानंतर दोघांमध्ये समझोता व्हावा यासाठी प्रयत्न सुरू होते. महिला पोलिसांकडून त्यांची समजूत घालण्यात येत होती. गुरूवारी हजर राहण्याचे दोघांना तारखा देण्यात आल्याने पीडित महिला ही महिला सहाय्य कक्षात हजर झाली होती. मात्र, पती आजारी असल्यामुळे महिलेचे सासरे त्याठिकाणी हजर झाल्याने पुन्हा दोघांना पुढील महिन्यातील तारीख देण्यात आली. दुपारी ३ वाजता महिलेच्या ओळखीतील ज्योती धनंजय वाडीले (वय ३६, रा. अमळनेर) या महिलेने व समाधान केवल जगताप (वय २८, रा. नाशिक) या तरुणाने प्रकरणाचा त्वरित निपटारा करून देण्यासाठी चक्क उपविभागीय पोलिस अधिकारी सचिन सांगळे यांना फोन करून आपण उपजिल्हाधिकारी जे. सिद्धांत असल्याची बतावणी करीत पीडित महिलेच्या पतीवर कारवाई करण्याची मागणी केली.

यावर डीवायएसपी सांगळेंना शंका आल्याने त्यांनी त्यास कार्यालयात बोलवून घेतले. दुपारी समाधान जगताप डीवायएसपी यांच्या कार्यालयात आल्यानंतर त्याने उपजिल्हाधिकारी जे. सिद्धांत असल्याची बतावणी केली. तो उपजिल्हाधिकारी नसल्याचा

कळताच सांगळे यांनी त्यास हिसका दाखवल्यानंतर त्याने खरी ओळख त्यांना सांगितली. दोघांविरुद्ध गुन्हा दाखल करण्यात आला.