पोलिस पथकावर ​जुगारींचा हल्ला

लक्कडकोटच्या क्लबवर कारवाई

म. टा. वृत्तसेवा, धुळे

नंदुरबार जिल्ह्यातील नवापूर तालुक्यातील लक्कडकोट गावात गेल्या काही महिन्यांपासून हायप्रोफाइल देवमोगरा नावाचा क्लब सुरू आहे, अशी माहिती नाशिक परिक्षेत्रातील विशेष पोलिस महानिरीक्षक विनय चौबे यांना कळाली होती. यानंतर त्यांनी येथे गोपनीय पथक पाठविले होते. या कारवाईसाठी आलेल्या पोलिस पथकावर जुगारींनी हल्ला करीत त्यांना जखमी केल्याची घटना रविवारी (दि. १७) रात्री १०.३० वाजेच्या सुमारास झाली. मात्र हा क्लब एका बड्या राजकीय नेत्याचा असल्याची माहिती समोर आली आहे. त्यामुळेच स्थानिक पोलिस कारवाईसाठी पुढे सरसावत नसल्याचे नागरिकांनी सांगितले आहे.

लक्कडकोटला चालणाऱ्या या क्लबबाबत माहिती मिळाल्यानंतर रविवारी, पोलिसांचे पथकाने याठिकाणी कारवाईसाठी गेले होते. त्यावेळी जुगारींच्या टोळक्याने व ग्रामस्थांनी पोलिसांच्या पथकावर हल्ला केला. यावेळी जुगारींनी पथकातील पोलिसांना मारहाण केली, त्यात पोलिस उपनिरीक्षक नितीन सुभाष खैरनार, दोन हवालदार, वाहनचालक यांच्यासह सोळा पोलिस जखमी झाले आहेत. यानंतर जुगारींनी आपले वाहन तेथेच सोडून पोबारा केला. दरम्यान, जखमींवर पोलिसांना नवापूर ग्रामीण रुग्णालयात उपचारासाठी दाखल करण्यात आले आहे. याप्रकरणी १२ जुगारींविरुद्ध नवापूर ठाण्यात गुन्हा दाखल करण्यात आला असून, दोन मोटार सायकली जप्त करण्यात आल्या आहेत.