गॅस गळतीने आग

जळगाव : तालुक्यातील पाथरी येथे सोमवारी (दि. २४) सकाळी महिला किचनमध्ये स्वयंपाक करीत असताना अचानक सिलिंडरची नळी लिक झाल्याने गॅसगळती झाली. यावेळी घरातील सामानाने पेट घेतला. यात संसारोपयोगी वस्तूंसह ५० हजारांची रोकड जळून खाक झाली आहे. ही घटना सकाळी साडेदहा वाजता घडली. पाथरी येथे रहिवासी प्रकाश आनंदा सोनवणे यांच्या पत्नी नेहमीप्रमाणे कुटुंबीयांसाठी स्वयंपाक करण्यासाठी किचनमध्ये गेल्या. गॅस पेटवला असता सिलिंडरची नळी लिक असल्याने स्फोट झाला.


मोटार सायकलस्वाराचा मृत्यू

चारा घेण्यासाठी गेलेल्या मोटार सायकलस्वारांची दुचाकी वृक्षाला आदळली. या अपघातात मोटारसायकल तरुणाचा जागीच मृत्यू झाला. ही घटना दुपारी २ वाजेच्या सुमारास म्हसावद जवळ घडली. शामू रामभाऊ धोत्रे (वय २०) असे मृत तरुणाचे नाव आहे. शामू वडील रामभाऊ, आई कमलबाई यांच्यासह संतोष, प्रकाश, गोविंदा, अर्जुन, कृष्णा या भावांसह म्हसावद येथील खडसेनगरमध्ये राहत होता. धोत्ररे कुटुंबीयांकडे शेळ्या व मेंढ्या आहेत. शेळ्या व मेंढ्यांसाठी चारा घेण्यासाठी शामू दुचाकी (क्रमांक एम.एच.२०-९१५४) ने बोरनार रस्त्याने गेला. त्यादरम्यान मोरी जिभू यांच्या शेताजवळ वळण रस्ता असल्याने शामूचे दुचाकीवरील नियंत्रण सुटले. त्यामुळे त्याची दुचाकी निंबाच्या वृक्षावर आदळली.