खड्डेमुक्तीला प्राधान्य द्या!

पालकमंत्री चंद्रकांत पाटील यांच्याकडून कंत्राटदार व अधिकाऱ्यांना सूचना

म. टा. प्रतिनिधी, जळगाव

जिल्हाभरातून रस्त्यांच्या खड्ड्यांबाबत येणार्‍या वाढत्या तक्रारींचा निपटारा करण्यासाठी नियोजन भवनात गुरुवारी (दि. ९) सकाळी झालेल्या ‘खड्डेमुक्त अभियान बैठक’मध्ये पालकमंत्री तथा सार्वजनिक बांधकाम मंत्री चंद्रकांत पाटील यांनी अधिकार्‍यांना रस्त्यांवरील खड्ड्यांचा प्रश्‍न गंभीर असल्याचे सांगितले. त्याकडे सर्व अधिकार्‍यांनी गांभीर्याने पाहावे व खड्डे बुजविण्यास प्राधान्य द्यावे दि. १५ डिसेंबरपर्यंत ही कामे पूर्ण करावी, अशा सूचना केल्या. यावेळी त्यांनी जळगाव ते अजिंठा या मार्गावरील रस्ते दुरुस्ती तत्काळ सूचित केले.

राज्यातील रस्त्यांचा पाया पक्का नसल्याने पावसाळ्यात मोठया प्रमाणात खड्डे पडतात, असे यावेळी बोलताना पालकमंत्र्यांनी सांगितले. आता पावसाळा संपल्याने सर्व संबंधित यंत्रणांनी आपल्या भागातील रस्त्यांवरील खड्डे भरण्याच्या कामास गती द्यावी. तसेच हे काम येत्या १५ डिसेंबरपूर्वी पूर्ण करावयाचे असल्याने यासाठी अद्ययावत तंत्रज्ञानाचा वापर करावा, असेही त्यांनी या बैठकीत अधिकाऱ्यांना बजावले. ठेकेदारांकडून नियमानुसार विहित मुदतीत उत्कृष्ट काम करून घ्यावे, ज्याठिकाणी चांगल्या दर्जाचे काम करणारे ठेकेदार उपलब्ध होत नसतील, टेंडरला अपेक्षित प्रतिसाद मिळत नसेल अशा ठिकाणी विभागाने स्वत: ती कामे पूर्ण करावीत, अशा सूचनाही संबंधितांना देण्यात आल्या.