मोफत प्रवास पास देण्याची मागणी

म. टा. प्रतिनिधी, जळगाव

राज्यभरातील निवृत्त एसटी कर्मचारी व त्यांच्या कुटुंबीयांना मोफत पास देण्यात यावी व २०१५ च्या सुप्रीम कोर्टाच्या आदेशाप्रमाणे पेन्शन वाढीबाबतच्या निर्णयाची अंमलबजावणी करण्यात यावी, अशी मागणी राज्य परिवहन निवृत्त कर्मचारी संघटनेच्या पदाधिकाऱ्यांनी बुधवारी (दि. २४) झालेल्या बैठकीत करण्यात आली.

शहरातील गांधी उद्यानात राज्य परिवहन निवृत्त कर्मचारी संघटनेच्या पदाधिकाऱ्यांची बैठक पार पडली. या बैठकीत विविध विषयांवर चर्चा करण्यात आली. सतीश पवार यांच्या अध्यक्षतेखाली पार पडलेल्या या बैठकीत संघटनेचे सचिव एस. सी. सूर्यवंशी, एस. एस. पवार, के. जी. देशमुख यांच्या शंभरहून अधिक कर्मचारी उपस्थित होते. बैठकीत पुणे येथे झालेल्या मिटिंगबाबतचे इतिवृत्त सादर करण्यात आले. तसेच संघटनेचे सभासदांची संख्या वाढविण्याकरिता संघटनेने भर द्यावे, असे आवाहन सुरेश सूर्यवंशी यांनी केले. यासह इतर विषयांवर बैठकीत चर्चा करण्यात आली.