लक्ष्मीपूजनासाठी सुवर्णनगरी सज्ज

दिवसभर फटाके, पूजा साहित्याची खरेदी

म. टा. प्रतिनिधी, जळगाव

लक्ष्मीपूजनाच्या पार्श्वभूमीवर बुधवारी (दि. १८) पूजा साहित्य व विविध वस्तूंच्या खरेदीसाठी बाजारपेठेत नागरिकांची गर्दी उसळली होती. लक्ष्मीच्या मूर्ती, झेंडू व शेवंतीची फुले, मिठाई व फटाक्यांना मोठ्या प्रमाणात मागणी होती. आज (दि. १९) साजऱ्या होणाऱ्या लक्ष्मीपूजनासाठी जळगावनगरी सज्ज झाली आहे.

बुधवारी नरक चतुर्दशीच्या अभ्यंग स्नानाने दिवाळीला सुरुवात झाली. दुपारनंतर नागरिकांनी लक्ष्मीपूजनाच्या खरेदीसाठी बाजारपेठेत गर्दी केलेली दिसत होती. लक्ष्मीपूजनाकरिता चमकदार, चमकी चढविलेल्या व साध्या अशा वेगवेगळ्या प्रकारातील मूर्ती विक्रीसाठी उपलब्ध होत्या. ४० ते ५०० रुपयांदरम्यान त्यांच्या किमती होत्या. कमळाच्या फुलाखेरीज शंखावर बसलेल्या लक्ष्मीच्या मूर्तींना ग्राहकांची मागणी होती. गेल्या वर्षाच्या तुलनेत यंदा मूर्तींमध्ये दरवाढ नसली, तरी मूर्तींची संख्या कमी आहे.

भातुकलीचे आकर्षण

लक्ष्मीपूजनासाठी आवश्यक वेगवेगळ्या प्रकारची पाच फळे १५ ते २० रुपयांना मिळत होती. त्यात आवळा, बोर, सीताफळ, पेरू, सफरचंद, मोसंबी, संत्री, केळी आदींचा समावेश होता. लाह्या-बत्तासे यांनाही मागणी होती. लहानग्यांसाठी आकर्षणाचा केंद्रबिंदू असलेला भातुकलीचा खेळ ३० ते ४० रुपयांना मिळत होता. लहान केरसुण्या व टोपली ३० रुपये जोडी, तर मोठी केरसुणी ५० रुपये जोडी होती. लक्ष्मीपूजनात या केरसुण्यांना विशेष स्थान असते. काही ठिकाणी कलरफुल टोपल्यांनी ग्राहकांचे लक्ष वेधून घेतले. जळगाव शहरातील शिवतीर्थ मैदानावर फटाक्यांचे स्टॉल लागले आहेत. तसेच राजकमल टॉकीज परिसरातदेखील दुकानांमध्ये फटाक्यांची विक्री सुरू होती. बुधवारी सकाळपासून फटाके खरेदीसाठी मोठ्यांसह चिमुकल्यांनी मोठी गर्दी केली होती. यंदा फटाक्यांच्या किमतीमध्ये वाढ झाली असल्याचे दिसून येत आहे. सुट्या फटाक्यांऐवजी बॉक्स घेण्याकडे नागरिकांचा जास्त कल दिसत होता.

फुलांचे मार्केट तेजीत

बाजारपेठेत झेंडू, शेवंती, कमळ व गुलाबाच्या फुलांना मागणी वाढली आहे. कमळाची फुले मुंबई येथून आणली जातात. केशरी व पिवळा अशा दोन रंगांतील झेंडूच्या आकारांमध्येही वैविध्य दिसून येते. मोठ्या आकारातील झेंडू हा ७० ते ६० रुपये, तर लहान आकारातील झेंडू हा ५० ते ४० रुपये किलोने दिवसभरात विकला गेला. कमळासह गुलाबाची फुले १० रुपये नग याप्रमाणे, तर विड्याची पाने पाच रुपयाला पाच पाने याप्रमाणे विकली गेली. पिवळी व पांढरी शेवंती प्रतिकिलो २०० ते २५० रुपये असा दर होता. सकाळपासून शहरातील टॉवर चौक ते थेट भिलपुरा चौकापर्यंत झेंडूच्या फुलांचे स्टॉल लागले होते. दसऱ्याच्या तुलनेत फुलांची आवक दिवाळीत जास्त असल्याने ९० रुपयांवरून भाव आता ५० रुपयांपर्यंत पोहचले होते.