जिल्ह्यात काँग्रेसला आशादायी चित्र

आमदार भाई जगताप यांचे मत

म. टा. प्रतिनिधी, जळगाव

जिल्ह्यातील काँग्रेसमधील गट-तट विसरून सर्व कुटुंब एकत्र आले आहे. त्यामुळे जिल्हा काँग्रेस बदलत असून जिल्ह्यात आशादायी चित्र निर्माण झाले आहे, असे मत आमदार भाई जगताप यांनी व्यक्त केले. या परिस्थितीत जिल्ह्यात आघाडीच्या माध्यमातून जिल्हापरिषदेवर काँग्रेस-राष्ट्रवादीची सत्ता येईल, असा विश्वासही जगताप यांनी गुरुवारी (दि. १९) पत्रकार परिषदेत व्यक्त केला.


काँग्रेसतर्फे बुधवारपासून जिल्ह्यातील १३४ गण व ६७ गटांसाठी इच्छुकांच्या मुलाखती सुरू आहेत. काल रावेर मतदारसंघासाठी मुलाखती झाल्यानंतर गुरुवारी, जळगाव लोकसभा मतदारसंघातील तालुक्यांच्या मुलाखती घेण्यात आल्यात. प्रभारी विनायकराव देशमुख, प्रदेश सचिव डी. जी. पाटील, अॅड. ललिता पाटील, जिल्हाध्यक्ष संदीप पाटील यांच्या समितीने मुलाखती घेतल्यात. सायंकाळी उशिरापर्यंत या मुलाखती पूर्ण झाल्या होत्या.


‘नोटाबंदी हा पंतप्रधानांचा घोटाळा’
दरम्यान, या संदर्भात आयोजित पत्रकार परिषदेत आमदार भाई जगताप यांनी काँग्रेसमध्ये बदल झाला असल्याचे सांगितले. मागील वेळेस उमेदवार शोधावे लागत होते मात्र, आता इच्छुकांची गर्दी होत आहे. नोटाबंदी व शेतकरी प्रश्नावर या निवडणुका लढणार असल्याचेही त्यांनी सांगितले. नोटाबंदी हा पंतप्रधान नरेंद्र मोदींचा घोटाळा असल्याचा आरोपही त्यांनी केला. सरकार हिटलरशाहीकडे वाटचाल करीत असल्याचेही ते म्हणाले. येत्या चार दिवसात यादी फायनल झाल्यानंतर समितीच्या माध्यमातून राष्ट्रवादीशी जागावाटपाबाबत बोलणी करून अंतिम यादी जाहीर केली जाईल, असे जगताप शेवटी म्हणाले.