कंटेनरच्या धडकेत ग्रामसेवक ठार

म. टा. प्रतिनिधी, जळगाव

महमार्गाच्या कडेवर थांबून मोबाइलवर बोलणाऱ्या ग्रामसेवकास मागून येणाऱ्या भरधाव कंटेनरने जोरदार धडक दिल्याने त्यांचा जागीच मृत्यू झाला. ही घटना सोमवारी (दि. २५) सकाळी सव्वा आठ वाजता जळगावातील कालिंका मात मंदिर चौकाजवळ घडली. संतोष लक्ष्मणराव मेहत्रे (वय ४२, रा. शिरसोली) असे मृत ग्रामसेवकाचे नाव आहे.

अपघातानंतर महापामार्गावर वाहतुकची कोंडी झाल्याने काहीवेळ वाहतूक ठप्प झाली होती. संतोष मेहत्रे हे मुळचे बुलढाणा तालुक्यातील सिंदखेडे राजा रेथील रहिवाशी आहेत. गेल्या काही महिन्यांपासून शिरसोली येथे पत्नी, मुलगा व मुलीसोबत राहत होते. बोदवड तालुक्यातील करंजी पंचायत समिती येथे ग्रामसेवक म्हणून कार्यरत होते. शनिवार व रविवारी कार्यालयाला सुटी असल्याने दोन दिवस मेहत्रे शिरसोली येथे घरीच होते.

सोमवारी नेहमीप्रमाणे सकाळी साडेसात वाजता दुचाकीने (एमएच. १९ डीके. ४९२१) ड्युटीसाठी निघाले. आठ वाजता त्यांना मोबाइलवर कॉल आला. दुचाकीवर बोलणे टाळण्यासाठी त्यांनी महामार्गाच्या कडेला दुचाकी थांबवून मोबाइलवर बोलत होते. याचवेळी मागून औरंगाबादकडून दिल्लीकडे बिअर बाटल्यांचे रिकामे खोके घेवून जात असलेल्या कंटेनरने (एचआर. ३८ डब्लु. ८४९३) त्यांच्या दुचाकीला धडक दिली. यात मेहत्रे हे रस्त्यावर फेकले गेले. त्यानंतर कंटेनरचे चाक पोटावरून गेल्याने गंभीर दुखापत होऊन त्यांचा जागीच मृत्यू झाला.

घटना घडल्यानंतर नागरिक धावून आल्याने कंटेनरचा किन्नर जसवंत सिंगने पळ काढला. मात्र, चालक मोहन तुल्ला सिंग याला नागरिकांनी पकडून ठेवले. एमआयडीसी पोलिसांना माहिती दिल्यानंतर सहाय्यक पोलिस निरीक्षक समाधान पाटील व कर्मचाऱ्यांनी घटनास्थळी धाव घेत पाहणी केली. मोठा जमाव महामार्गावर असल्याने वाहतूक काहीकाळ ठप्प झाली होती. पोलिसांनी तसेच नागरिकांनी मेहत्रे यांना लागलीच रुग्णवाहिकेतून सिव्हिल हॉस्पिटलला नेले. पोलिसांनी घटनेबाबत त्यांच्या कुटुंबीयांना कळवल्यावर त्यांनीही रुग्णालयात धाव घेतली. पोलिसांनी कंटेनरसह चालकास ताब्यात घेतले असून, याप्रकरणी पोलिसात गुन्हा दाखल करण्यात आला आहे.