ग्रंथोत्सवानिमित्त आजपासून भरगच्च कार्यक्रम

म. टा. प्रतिनिधी, जळगाव

उच्च व तंत्रशिक्षण विभाग, ग्रंथालय संचालनालय, महाराष्ट्र राज्य, मुंबई व जिल्हा ग्रंथालय अधिकारी कार्यालय, जळगाव यांच्या संयुक्त विद्यमाने आज (दि. १०) पासून दोन दिवसीय ‘ग्रंथोत्सव -२०१८’ चे आयोजन करण्यात आले आहे. या ग्रंथोत्सवात ग्रंथ दिंडी, ग्रंथप्रदर्शन व विक्रीसोबत ग्रंथजत्रा, व्याख्यान, परिसंवाद, काव्यसंमेलन आदी कार्यक्रमांचे आयोजन करण्यात आल्याची माहिती अपर जिल्हाधिकारी गोरक्ष गाडीलकर यांनी दिली.

ग्रंथोत्सवाची सुरुवात आज (दि. १०) ग्रंथदिडीने होणार आहे. ग्रंथदिंडी बहिणाबाई उद्यान येथून सकाळी नऊ वाजता निघेल. या वेळी महापौर सीमा भोळे व आमदार सुरेश भोळे यांच्या हस्ते ग्रंथदिंडीचे पूजन होईल. प्रमुख पाहुणे म्हणून जिल्हाधिकारी किशोर राजेनिंबाळकर, जिल्हा परिषदेचे मुख्य कार्यकारी अधिकारी शिवाजी दिवेकर, माध्यमिक‍ शिक्षणाधिकारी देविदास महाजन उपस्थित राहतील. सकाळी ११ वाजता पालकमंत्री चंद्रकांत पाटील यांच्या हस्ते ग्रंथोत्सवाचे उद्घाटन होईल.

काव्यसंमेलनाची मेजवानी
ग्रंथोत्सवातील पहिल्या सत्राला आज दुपारी तीन वाजता सुरुवात होईल. यात ‘सार्वजनिक ग्रंथालयांची आधुनिकतेकडे वाटचाल’ या विषयावरील परिसंवाद होईल. त्र्यंबक कापडे, विनय पाटील, राहुल रनाळकर व विनय श्रीनाथ कंची यांचा सहभाग असेल. दुसरे सत्र दुपारी ५ ते सायंकाळी ८ या वेळात होईल. यात काव्यसंमेलन व सांस्कृतिक कार्यक्रम होणार आहे. काव्यसंमेलनाच्या अध्यक्षस्थानी डॉ. किसन पाटील हे राहणार आहेत. उद्या (दि. ११) सकाळी ११ वाजता लेवा बोर्डिंग हॉल येथे ‘ग्रंथजत्रा’ आयोजित करण्यात आली असून, जत्रा सकाळी ११ ते सायंकाळी ८ वाजेपर्यंत सर्वांसाठी विनामूल्य खुली राहणार आहे.

व्याख्यानाचे आयोजन
ग्रंथोत्सावाच्या दुसऱ्या दिवशी मंगळवारी (दि. ११) पहिल्या सत्रात सकाळी ११ ते १ दरम्यान ‘२१ व्या शतकातील आव्हाने आणि गांधी विचारांची आवश्यकता’ या विषयावर इतिहासतज्ञ आणि परिक्षा नियंत्रक, गांधी रिसर्च फाउंडेशन, जळगाव भुजंगराव बोबडे यांचे विशेष व्याख्यानाचे आयोजन करण्यात आलेले आहे. दुसऱ्या सत्रात दुपारी ३ ते ५ दरम्यान ‘स्पर्धा परीक्षा संभ्रम आणि वास्तव’ या विषयावर परिसंवादाचे आयोजन करण्यात आले आहे. सांयकाळी ५ ते ७ दरम्यान डॉ. मिर्झा रुफी अहमद बेग यांच्या ‘मिर्झा एक्स्प्रेस’ हा विनोदी कार्यक्रम होणार असून, त्यानंतर ग्रंथोत्सवाचा समारोप होणार आहे.