शेती केल्याने मिळते सुख, संपत्ती अन् प्रतिष्ठा

उद्योजक अनिल जैन यांचा विश्वास

म. टा. प्रतिनिधी, जळगाव

शेती करून सुख, संपत्ती आणि प्रतिष्ठा मिळवून उत्तम पद्धतीने जगू शकतो हे तुम्ही फालीचे विद्यार्थी सिद्ध करू शकतील, असा विश्वास जैन इरिगेशनचे उपाध्यक्ष अनिल जैन यांनी व्यक्त केला.

जैन इरिगेशन सिस्टीम्स्‌ लि. व ‘ॲक्शन प्लॅटफार्म’तर्फे आयोजित भारताच्या कृषिक्षेत्रातील भविष्यदर्शी नायकांच्या ‘फाली २०१९’ पाचव्या संमेलनाच्या दुसऱ्या सत्राचा समारोप सत्रात ते बोलत होते. यात इनोव्हेशन स्पर्धेत एम. जे. शहा विद्यालयाच्या विद्यार्थ्यांनी सादर केलेले ‘हायटेक स्प्रेअर’ प्रथम ठरले. तसेच बिझनेस प्लान स्पर्धेत पुणे जिल्ह्यातील सोमेश्वर विद्यालय अंजनगाव विद्यालयाच्या विद्यार्थ्यांनी सादर केलेल्या ‘भाजीपाला सूप’ने प्रथम क्रमांक पटकाविला.

या वेळी जैन फार्म फ्रेश फुडसच्या अमोली जैन, डॉ. डी. एन. कुळकर्णी, डॉ. के. बी. पाटील, किशोर रवाळे, ॲक्शन प्लॅटफार्मच्या समन्वयिका नॅन्सी बेरी, गोदरेज एग्रोवेटचे डॉ. आर. एस. मसली, युपीएलचे प्रताप रनखांब, बायर क्रॉप सायन्सचे जिंतेंद्र गावंडे, स्टार ॲग्रीचे कैलास कलभंडे, रयत शिक्षण संस्थेचे कमलाकर महामुनी उपस्थित होते. दुसऱ्या टप्प्याच्या विजेत्या विद्यार्थ्यांचा गौरव करण्यात आला. या वेळी सहभागी विद्यार्थ्यांना टी-शर्ट आणि कॅपचे वाटप करण्यात आले. फालीचे व्यवस्थापक हर्ष नौटियाल यांनी सूत्रसंचालन केले. रोहिणी घाडगे, सचिन पवार, प्रदीप गरकड यांनी सहकार्य केले.

फाली इनोव्हेशन स्पर्धेतील विजेते
प्रथम - हायटेक स्प्रेअर (एम. जे. शहा विद्यालय, बाहुबली), द्वितीय: मल्टिपर्पज अॅग्रीकल्चर टूल (महात्मा गांधी विद्यालय), तृतीय : चना स्प्रुनिंग मशिन (मगरवाडा हायस्कूल), चतुर्थ : स्मार्ट सोलर इरिगेशन (समाजभूषण हनुमंतराव साळुखे विद्यालय, कलढोण), पाचवा क्रमांक : अॅग्रीकल्चर रोबोट (के. बी. पी. कृषी विद्यालय, देवापूर).

बिझनेस प्लॅन स्पर्धेतील विजेते
प्रथम : भाजीपाला सूप (सोमेश्वर विद्यालय अंजनगाव), द्वितीय : शेवगा पावडर (विठ्ठल माध्यमिक विद्यालय, भिकोबानगर), तृतीय : कडकनाथ पोल्ट्री फार्म(जिजामाता हायस्कूल, नागपूर), चतुर्थ : देशी गाय पाल (देशी कॅटल रेअरिंग) (कर्मवीर भाऊराव पाटील विद्यालय, नेरळे) तर पाचवा क्रमांक : केळी बर्फी (एस. एस. पाटील विद्या मंदिर, चहार्डी जि. जळगाव)