शिवाजीरोडवर हॉकर्सचा प्रयत्न हाणून पाडला

म. टा. प्रतिनिधी, जळगाव

महापालिकेच्या कारवाईविरोधात जळगाव शहरातील हॉकर्स संघर्ष समितीकडून आंदोलन सुरू आहेत. सोमवारी (दि. ३० मे) रोजी सुभाषचौकात हॉकर्सने गोंधळ घातल्यानंतर मंगळवारी (दि. ३१ मे) देखील शिवाजीरोड परिसरात गाड्या लावून व्यवसाय करण्याचा प्रयत्न हॉकर्सने केला. सकाळी साडेनऊ वाजता आलेल्या अतिक्रमण विभागाच्या पथकाने या हॉकर्सला उठवित त्यांचा प्रयत्न हाणून पाडला.

सोमवारी (दि. ३० मे) सकाळी संघर्ष समितीच्या नेतृत्वाखाली सुभाष चौकात हॉकर्सने पुन्हा दुकाने थाटण्याचा प्रयत्न केला होता. मंगळवारी (दि. ३१ मे) सकाळी ९ वाजता शहरातील शिवाजीरोडवर तेथून स्थलांतरीत केलेल्या दहा ते पंधरा विक्रेत्यांनी पुन्हा हातगाड्या लाऊन व्यवसाय सुरू करण्याचा प्रयत्न केला. अतिक्रमण विभागास याची माहिती मिळताच अतिक्रमण अधीक्षक एच. एम. खान व त्यांचे पथक पोहचून त्यांनी या विक्रेत्यांना उठवित साहित्य जप्त करण्याचा इशारा दिला. शेवटी अर्धातासाच्या गोंधळानंतर हॉकर्स येथून उठले.फेरीवाला सेनेचे अध्यक्ष बाळू बाविस्कर यांच्यासह सुभाष चौकातील असंख्य विक्रेत्यांनी जिल्हाधिकारी यांची भेट घेऊन महापालिकाकडून अतिक्रमण कारवाईच्या नावाने झालेल्या अन्याय दूर करण्याची मागणी केली. यावेळी सरकारने या कारवाईस स्थगिती देण्यात आल्याचा दावादेखील त्यांनी पत्रकारांशी बोलताना केला.