येत्या २४ तासांत अतिवृष्टीचा इशारा

म. टा. वृत्तसेवा, जळगाव

जिल्ह्यात परतीच्या पावसानेदेखील चांगलीच हजेरी लावली आहे. सलग चौथ्या दिवशी जळगाव शहरासह जिल्ह्यात सर्वदूर पावसाने दमदार हजेरी लावली. त्यामुळे जनजीवन विस्कळीत झाले असले, तरी शेतकरीवर्गाला दिलासा मिळाला आहे. आगामी २४ तासात जिल्ह्यात जोरदार पावसाचा अंदाज हवमान खात्याने वर्तविला आहे.

जिल्ह्यात यंदा सरासरीच्या ८४ टक्के पाऊस झाला आहे. गेल्या आठवड्यापासून परतीच्या पावसाचे दमदार आगमन झाले आहे. त्यामुळे धरणांमधील जलसाठा वाढत आहे. गिरणा धरणात ६८ टक्के जलसाठा झाला आहे, तर हतनूरमध्ये ८७ टक्के जलसाठा आहे. पाऊस असाच चालू राहिल्यास हतनूर धरण १०० टक्के भरण्याची अपेक्षा आहे. परतीचा पाऊस संपूर्ण महाराष्ट्रभर सक्रीय झाला आहे. येत्या २४ तासांत जिल्ह्यासह मराठवाड्यात मुसळधार पावसाचा अंदाज कुलाबा वेधशाळेकडून वर्तविण्यात आला आहे. विदर्भाकडील भागात चक्रवाती क्षेत्र तयार झाल्यामुळे खान्देशसह संपूर्ण राज्यभर जोरदार ते अतिजोरदार पाऊस होण्याचा अंदाज असल्याची माहिती कुलाबा वेधशाळेचे हवामान तज्ज्ञ अजयकुमार यांनी ‘मटा’शी बोलताना दिली.

शेतीला फायदा

परतीच्या पावसामुळे शेतीला मोठा फायदा झाला आहे. सोयाबीन, कापूस या पिकांसह आगामी रब्बी हंगामासाठीदेखील हा पाऊस उपयोगी ठरला आहे. जिल्ह्याचे प्रमुख पीक केळीलादेखील या पावसामुळे फायदा होणार आहे. जलयुक्त शिवारांतर्गत झालेल्या कामांमध्ये जलसंचय झाला आहे. त्यामुळे उन्हाळ्यात पाणीटंचाईची समस्या भेडसावणार नसल्याचे दिसून येत आहे.

भुसावळ तालुक्यात सार्वाधिक पाऊस

शनिवारी जिल्ह्यात एकूण २३१ मि. मी. पावसाची नोंद झाली आहे. भुसावळ तालुक्यात सर्वाधिक ४० मि. मी. पाऊस झाला आहे. त्या खालोखाल चाळीसगावमध्ये ३४.७, जळगाव १०.७, जामनेर ९.६, एरंडोल ४, धरणगाव ९.७, यावल २९.८, रावेर २०.३, मुक्ताईनगर १५.३, बोदवड २३.७, पाचोरा २.६, भडगाव १३.३, अमळनेर ५.४, पारोळा २.८ तर चोपडा तालुक्यात १० मि. मी. पावसाची नोंद करण्यात आली आहे. जिल्ह्यात आतापर्यंत सरासरीच्या ८४ टक्के पावसाची नोंद करण्यात आली आहे.