आजपासून हेल्मेटसक्ती

शाळा, कॉलेजसह औद्योगिक कंपन्यांना पत्र

म. टा. प्रतिनिधी, जळगाव

महामार्गावर सर्वाधिक अपघात हे दुचाकीस्वारांचे झाले आहेत. ही वस्तुस्थिती लक्षात घेऊन जिल्हा पोलिस प्रशासनाने महामार्गावर आज (दि. १७) पासून दुचाकीस्वारांना हेल्मेट तर चारचाकीधारकांसाठी सीटबेल्ट सक्ती केली आहे. त्यामुळे राष्ट्रीय महामार्ग तसेच राज्य महामार्गावर सीटबेल्ट व हेल्मेटचा वापर न करता नियमांचे उल्लघंन करणार्‍या वाहनधारकांवर आजपासून कारवाई करण्यात येणार आहे.

पोलिस अधीक्षक डॉ. जालिंदर सुपेकर यांच्या स्वाक्षरीचे हेल्मेट व सीटबेल्ट वापर करण्याबाबतचे पत्र प्राचार्य, कंपन्यांचे व्यवस्थापक यांना शहर वाहतूक शाखेतर्फे देण्यात आले आहे.

तसेच आजपासून जिल्ह्यातील सर्व महामार्ग, राज्यमार्गावर हेल्मेट व सीटबेल्ट वापराबाबत तसेच नियम पालन करण्यासाठी जिल्हा पोलिस दल व उपप्रादेशिक परिवहन विभाग यांच्यामार्फत कारवाई करण्यात येईल. यामध्ये सुमारे २५० कंपनीमालक, संचालकांना हेल्मेट सक्तीचे पत्र देण्यात आले आहे.