शौर्य प्रात्यक्षिकांनी वेधले लक्ष

म. टा. प्रतिनिधी, जळगाव

सनातन संस्थेचे संस्थापक डॉ. जयंत आठवले यांच्या अमृत महोत्सवानिमित्त जळगावात काढण्यात आलेल्या हिंदू एकता दिंडीच्या माध्यमातून जळगावकरांनी भक्ती व शक्तीचा संगम अनुभवला. नेहरू चौकातून ११ शंखांच्या ध्वनीनिनादाने दिंडीची सुरुवात करण्यात आली.दिंडीत सहभागी झालेल्या शौर्य प्रात्यक्षिकांनी लक्ष वेधून घेतले होते.

दिंडीपूर्वी ज्येष्ठ पत्रकार हेमंत अलोने, महापौर नितीन लढ्ढा, शाम कोगटा यांच्या हस्ते धर्म ध्वजपूजन करण्यात आले. त्यानंतर अॅड. सुशील अत्रे यांच्या हस्ते गोमाता पूजन करण्यात आले. नेहरू चौकातून दिंडीची सुरुवात करण्यात आली.

दिंडीमध्ये रणरागीणीच्या वेशातील शौर्यत्व जागृत करणारे खेळ त्यात दांडपट्टा, तलवारबाजी, दंडसाखळी, लाठी, काठी अशा प्रात्यक्षिकाने मार्गातील चौक दणाणले होते. दिंडीत रथावर शिवकालीन वेशभूषा करून संत, महापुरुषांचे सजीव देखावे करण्यात आले होते. जयतु हिंदू राष्ट्र, हर हर महादेव, जय शिवाजी जय भवान अशा घोषणा देण्यात येत होत्या. महिलांचे लेझीमपथक लक्ष वेधून घेत होते. अनेक चित्ररथही दिंडीत सहभागी झाले होते. दिंडीत असंख्य पुरुष व महिला सहभागी झाल्या होत्या. चौकाचौकात दिंडीवर पूष्पवृष्टी करून स्वागत करण्यात येत होते. दिंडी नेहरू चौक मार्गे, टॉवर चौक, चित्रा चौक, शिवाजी महाराज स्मारक, मार्गे पुन्हा नेहरू चौकातील खान्देश सेन्ट्रलच्या रस्त्यावर सभेत रुपांतर झाले. यावेळी नंदकुमार जाधव, सुनील घनवट, शिवसेनेचे गजानन मालपुरे यांच्यासह शेकडो कार्यकर्ते सहभागी झाले होते.