घरफोड्यांचे सत्र सुरूच

निवृत्तीनगरात ७४ हजारांची घरफोडी

म. टा. प्रतिनिधी, जळगाव

निवृत्तीनगरातील एका बंद घराचे कुलूप तोडून घरातून ७४ हजार रुपयांचा ऐवज चोरट्यांनी लंपास केल्याची घटना सोमवारी सकाळी ७ वाजता उघडकीस आली. दरम्यान, गेल्या काही दिवसांपासून सुरू असलेल्या चोरी, घरफोडीच्या घटनांमुळे नागरिकांमध्ये भीती निर्माण झाली आहे.

निवृत्ती नगरातील स्वामी समर्थ केंद्राजवळ रामचंद्र भगवान साळुंखे यांचे घर आहे. ७ सप्टेंबर रोजी सायंकाळी ६ वाजेपासून साळुंखे कुटुंबीय बाहेरगावी गेले होते. ते सोमवारी सकाळी ७ वाजता घरी परतले. घराच्या दरवाजाचे कुलूप तुटलेले आढळून आले. साळुंखे यांनी घरात तपासणी केली असता कपाट देखील फोडलेले होते. कपाटाताील ४० हजार रुपये किमतीची सोन्याची पोत, ३ हजाराच्या दोन सोन्याच्या अंगठ्या, १५ हजार रुपयांची सोन्याची चेन, ८ हजार रुपयांच्या रिंग, ४ हजार रुपयांचे सोन्याचे तुकडे व ४ हजाराचे चांदीचे दागिने असा एकूण ७४ हजार रुपयांचा ऐवज चोरट्यांनी लांबविले. या प्रकरणी साळुंखे यांनी दिलेल्या फिर्यादीवरून जिल्हा पेठ पोलिस ठाण्यात गुन्हा दाखल करण्यात आला असून, पोलिस उपनिरीक्षक नाना सूर्यवंशी तपास करीत आहेत.

पटेल नगरातही चोरी
शहरातील पटेलनगर भागात राहणाऱ्या प्रवीणचंद्र दिनाभाई पटेल यांच्या घरातील कपाटातून ८५ हजार रुपयांची रोकड लंपास झाल्याची घटना शनिवारी (दि. ८) समोर आली. पटेल यांच्या घरात काम करणाऱ्या एका नोकरावर त्यांनी संशय व्यक्त केला आहे. घरात सर्वजण असताना ६ ते ८ सप्टेंबरच्या दरम्यान कोणीतरी कपाटातून रोकडे लंपास केल्याचे पटेल यांच्या लक्षात आले. त्यानुसार त्यांनी रामानंदनगर पोलिस ठाण्यात फिर्यादी दिली असून, संशयिताचे नावदेखील त्यांनी दिले आहे. त्यानुसार गुन्हा दाखल करण्यात आला असून, विजय निकुंभ तपास करीत आहेत.