ग्राहक खरेदीबाबत विद्यार्थ्यांचे सर्वेक्षण

म. टा. प्रतिनिधी, जळगाव

केसीई सोसायटी संचलित आयएमआर महाविद्यालयात ‘उद्योजकता विकास सेल’ उपक्रमांतर्गत बीबीए इंटिग्रेटेडच्या ७० विद्यार्थ्यांनी गणेश चतुर्थीपासून ते दिवाळी पर्यंतच्या काळात होणारी उलाढाल व लोकांच्या आवडी निवडीबाबत शहरातील १२३० घरांमध्ये सर्वेक्षण केले असल्याची माहिती महाविद्यालयाच्या संचालिका डॉ. शिल्पा बेंडाळे यांनी गुरूवारी पत्रकार परिषदेत दिली.

आयएमआर महाविद्यालयातील बीबीएच्या विद्यार्थ्यांनी गेल्या आठवड्यात पाच दिवस शहरातील १२३० घरांमध्ये प्रश्‍नावलीच्या माध्यामातून सर्वेक्षण करत माहिती संकलित केली. या सर्वेक्षणात होम किचन, इलेक्‍ट्रॉनिक्‍स वस्तू यांमध्ये बाजारपेठेत होणारी उलाढाल याबाबत माहिती जमा केली. या सर्वेक्षणाचे प्रा. विशाल संदानशीवे व प्रा. नितीन खर्चे यांनी सांख्यिक विवरण तयार केले. या प्रोजेक्टसाठी प्रा. स्वप्नील काटे, प्रा. खुशबू बांगर, प्रा. दीपाली पाटील, जनसंपर्क अधिकारी चंद्रशेखर वाणी, विजय पाटील यांचे सहकार्य लाभले. होम किचन आणि इलेक्‍ट्रॉनिक्‍स उत्पादन खरेदी यामध्ये सर्वात जास्त २९.१७ टक्के मोबाइल खरेदीला पसंती देण्यात आली आहे. यासह विविध उत्पादनांच्या आवडीनुसार माहितीचादेखील यात समावेश आहे, असे या सर्वेक्षणातून समोर आले आहे.