वक्तृत्व स्पर्धेत अंजली पाटील प्रथम

‘एमजे’त हुंडाविरोधी चळवळ संस्थेकडून आयोजन

म. टा. प्रतिनिधी, जळगाव

हुंडाविरोधी चळवळ, मुंबई या संस्थेकडून आयोजित उ. म. वि. स्तरीय आंतर महाविद्यालयीन वक्तृत्व स्पर्धेत अंजली पाटील या विद्यार्थिनीने प्रथम क्रमांक पटकावला.

कार्यक्रमाच्या अध्यक्षस्थानी महाविद्यालयाचे प्राचार्य डॉ. उदय कुलकर्णी होते. आपली भूमिका तयार होण्यासाठी आणि उत्कृष्ट वक्ता होण्यासाठी ही स्पर्धा महत्त्वाची आहे, असे मत त्यांनी या वेळी व्यक्त केले. श्रवण, वाचन, निरीक्षण यातून तुम्ही चांगले तयार व्हाल असा सल्लाही त्यांनी विद्यार्थ्याना दिला. या स्पर्धेत जळगाव आणि धुळे जिल्ह्यातील ९ महाविद्यालयातील १४ स्पर्धक सहभागी झाले होते. या स्पर्धेसाठी ‘कायद्याच्या मदतीने हुंडा निर्मूलन यशस्वी होईल का?’, ‘सुदृढ समाजासाठी स्त्री-पुरुष समानता’, ‘हुंडा निर्मुलनासाठी पुरुषांची भूमिका आणि योगदान’, ‘हुंड्याची वाढती प्रथा आणि भ्रष्टाचार’, ‘आधुनिक युगात महात्मा गांधींच्या विचारांची समर्पकता’ असे सहा विषय देण्यात आले होते. मराठी, इंग्रजी आणि हिंदी भाषेत उपरोक्त विषयांवर स्पर्धक विद्यार्थ्यांनी आपली अभ्यासपूर्ण मते मांडली.

स्पर्धेचे समारोप प्रसंगी प्राचार्य डॉ. एस. के. जोगी प्रमुख अतिथी म्हणून उपस्थित होते. समाजात हुंडा प्रथा अजूनही शिल्लक आहे. ही आपली शोकांतिका असल्याची खंत त्यांनी व्यक्त केली. सामाजिक परिवर्तन घडवून आणण्याची क्षमता तरुणांमध्ये असल्याचेही ते म्हणाले. अध्यक्षस्थानी कला विद्याशाखेचे उपप्राचार्य डॉ. सुरेश तायडे होते. स्पर्धेचा आढावा डॉ. मनोज महाजन यांनी सादर केला. सूत्रसंचालन प्रा. दीनानाथ पाठक यांनी केले तर आभार प्रा. गोपीचंद धनगर यांनी मानले. या प्रसंगी हुंडाविरोधी चळवळ मुंबईच्या महासचिव आशाताई कुलकर्णी उपस्थित होत्या. त्यांनी ही चळवळ चालविण्यामागची भूमिका विषद केली. स्पर्धेचे परीक्षण प्रा. संध्या महाजन आणि प्रा. डिंपल पाटील यांनी केले.

स्पर्धेतील विजेत्यांची नावे...
अंजली पाटील - प्रथम क्रमांक (पी. ओ. नाहाटा महाविद्यालय, भुसावळ)
वर्षा उपाध्ये - द्वितीय क्रमांक (मू. जे. महाविद्यालय, जळगाव)
गणेश सावळे - तृतीय क्रमांक (एस. एस. मणियार विधी महाविद्यालय, जळगाव)
उत्तेजनार्थ - संजय उपाध्याय, धीरज सपकाळे, प्रणिता गुजर, प्राजक्ता काचकुटे, सायली महाजन रुचिता उज्जैनकर, साक्षी जयस्वाल