आरोग्य विभागासाठी मनपात स्वतंत्र उपायुक्त

म. टा. प्रतिनिधी, जळगाव

मनपाला पहिल्यांदाच तीन उपायुक्त लाभल्यानंतर त्यांच्या कामांची विभागणी आयुक्त डॉ. उदय टेकाळे यांनी केली आहे. मिनीनाथ दंडवते यांची सार्वजनिक आरोग्यासाठी उपायुक्तांची नियुक्ती करण्यात आली आहे. जळगाव महापालिकेत प्रथमच आरोग्यासाठी स्वतंत्र उपायुक्त मिळाले आहेत. डॉ. उदय पाटील यांच्याकडून आरोग्य अधिकारीपदाचा कार्यभार काढून डॉ. विकास पाटील यांची पूर्णवेळ आरोग्य अधिकारीपदी नियुक्ती करण्यात आली आहे.

उपायुक्त उत्कर्ष गुट्टे यांच्याकडे महसूलची जबाबदारी देण्यात आली आहे. यामध्ये चारही प्रभाग समित्यांची वसुली, किरकोळ वसुली विभाग, व्यापारी संकुल विभाग, घरकुल वसुली विभाग, खुला भूखंड, अतिक्रमण निर्मूलन विभाग, जाहिरात विभाग, अग्निशमन व आपत्कालीन विभागाची जबाबदारीदेखील गुट्टे यांच्याकडे राहणार आहे. सामान्य प्रशासनाच्या उपायुक्तपदाची जबाबदारी अजित मुठे यांच्याकडे देण्यात आली असून, यामध्ये आस्थापना विभाग, विधी विभाग, अर्थ विभाग, लेखा परीक्षण, नगर सचिव, जनसंपर्क विभाग, जनगणना व निवडणूक प्रमुख कार्यालय, शिक्षण, बालवाडी, साने गुरूजी ग्रंथालयासह क्रीडा, भांडार विभागाची जबाबदारी देण्यात आली आहे. मिनीनाथ दंडवते यांच्याकडे सार्वजनिक आरोग्य उपायुक्तपद देण्यात आले आहे. पहिल्यांदाच आरोग्यासाठी उपायुक्त महापालिकेला उपलब्ध होणार असल्याने आरोग्याचा समस्यांकडे विशेष लक्ष देण्याचा प्रयत्न आयुक्त डॉ. टेकाळेंचा दिसून येत आहे. जन्म-मृत्यू विभाग, शासकीय योजना, स्वच्छ भारत अभियान, घनकचरा व्यवस्थापन, अन्न व भेसळ प्रतिबंधक, वाहन विभागासह परिवहन व विद्युत विभागाची जबाबदारीदेखील दंडवते यांच्याकडे राहणार आहे.