कैद्यांनी पुकारले उपोषण

कलम ३०७ मागे घेण्याची मागणी

म. टा. प्रतिनिधी, जळगाव

कोरेगाव-भीमा येथे झालेल्या घटनेच्या निषेधार्थ पुकारण्यात आलेल्या बंद काळात भुसावळ येथे दगडफेकीचा प्रकार घडला होता. याप्रकरणी अटकेत असलेल्या १८ संशयितांनी गुन्ह्यातील कलम ३०७ मागे घेण्यात यावा. तसेच संभाजी भिडे व मिलिंद एकबोटे यांना अटक करावी यासाठी जिल्हा कारागृहात सोमवार (दि. ५) पासून उपोषण सुरू केले आहे.

भुसावळ येथे कोरेगाव-भीमा येथे झालेल्या घटनेच्या निषेधार्थ पुकारण्यात आलेल्या बंद काळात काही तरुणांनी बसवर दगडफेक केली होती. याप्रकरणी १८ जणांना अटक करण्यात आली होती. त्या सर्व संशयितांनी तीन दिवसांपूर्वी जिल्हाधिकारी यांच्या नावाचे निवेदन कारागृह अधीक्षकांना दिले होते. त्यावेळी जिल्हा कारागृहात असलेले बंदी रविंद्र पगारे, सदानंद खंडेराव, भावेश भालेराव, नितीन महेंद्र खरे, भगवान गायकवाड, श्रावण देवरे, अमोल बनसोडे, तुषार वाघ, चेतन आव्हाड, नितीन वाघ, विशाल कोचूरे, भिमा इंगळे, आशिष सोनवणे, किशोर लोखंडे, आकाश सपकाळे, आकाश वानखेडे, विशाल सपकाळे, संगीत खंडेराव या कैद्यांनी कोरेगाव-भीमा येथे झालेल्या घटनेच्या दोषींना शिक्षा देण्याची मागणी केली होती. जळगाव कारागृहातील कैद्यांनी दिलेल्या निवेदनाबाबत न्यायालय आणि वरिष्ठांना तत्काळ कळविण्यात आले असल्याची माहिती कारागृह अधीक्षक विलास साबळे यांनी दिली आहे.