वाहतूक पोलिसांशी हुज्जत घालणाऱ्या चालकाला दंड

म. टा. प्रतिनिधी, जळगाव

शहरातील आकाशवाणी चौकात सोमवारी (दि. ६) सीटबेल्ट न लावल्याने मेमो देणाऱ्या वाहतूक पोलिसाशी कारचालकाने हुज्जत घातली. याचवेळी मीडियाचा प्रतिनिधी असल्याची बतावणी करीत अन्य एका तरुणानेदेखील अरेरावीचा प्रयत्न केला. या दोघांना वाहतूक शाखेत नेवून कारचालकाकडून दंड तर तरुणाला तंबी देऊन सोडण्यात आले.

निसार अहमद पटेल (रा. धरणगाव) हा सोमवारी सकाळी पावणेबारा वाजता वाजेच्या सुमारास त्याची कार (क्र. एमएच-०४-सीडी-७२३६) घेऊन ईच्छादेवी चौफुलीकडून आकाशवाणीकडे येत होता. त्यावेळी आकाशवाणी चौकातील वाहतूक पोलिस योगेश पवार, विनोद चौधरी यांनी निसार पटेलची कार थांबविली. त्याने सीटबेल्ट लावलेला नव्हता. त्यामुळे त्यांनी २०० रुपये दंड भरण्यास सांगितले. त्यावरून योगेश पवार आणि निसार यांच्यात वाद झाला. त्याने खाली उतरून पोलिस कर्मचाऱ्यांशी हुज्जत घालून अरेरावी करून त्यांच्या अंगावर धावून गेला. त्यानंतर त्याने धरणगाव नगराध्यक्षांचा नातेवाईक असल्याचे पोलिसांना सांगितले.

वाहतूक पोलिसांचा निसार पटेल याच्याशी वाद सुरू असतानाच या घटनेचे नीलेश वर्मा नावाचा तरूण मोबाइलमध्ये शुटिंग करीत होता. त्यावेळी पोलिस कर्मचारी व्ही. एस. जोशी यांनी त्याला शुटिंग का करतोय? म्हणून विचारले. त्याचा राग आल्याने त्यानेही पोलिसांशी हुज्जत घातली. आपण मीडियाचा प्रतिनिधी असल्याची बतावणी करून त्याने अरेरावी केली. वाद घालणाऱ्या निसार पटेल आणि नीलेश वर्मा या दोघांना पोलिस शहर वाहतूक शाखेच्या कार्यालयात घेऊन गेले. त्यानंतर कारचालक निसार पटेल याच्यावर दंडात्मक कारवाई करून तर नीलेश वर्मा याला समज देऊन सोडून दिले.

व्यक्ती बेपत्ता

भुसावळ : शहरातील पंकज यादव चोपडे (रा. आनंद नगर, वय ४०) हे २६ जानेवारीपासून बेपत्ता आहेत. याबाबत सरला यादव चोपडे यांच्या तक्रारीवरून बाजारपेठ पोलिस ठाण्यात नोंद झाली आहे. या व्यक्तीच्या डाव्या हातावर मराठीत पंकज लिहलेले आहे. त्यांनी अंगात कॉटनचा शर्ट व राखाडी रंगाचा कोट परिधान केलेला आहे. त्यांची उंची ५ फूट १० इंच, रंगाने गोरा शरीराने सडपातळ असे त्यांचे वर्णन आहे. ही व्यक्ती कोणाला आढळल्यास त्याची माहिती पोलिसांना देण्याचे आवाहन करणयात आले आहे.