खूनप्रकरणी मुख्य संशयित अटकेत

म. टा. प्रतिनिधी, जळगाव

शनीपेठेतील शनी मंदिरासमोरील गल्लीत पूर्ववैमनस्यातून दोघांनी एका तरुणाचा डोके दगडाने ठेचून निर्घृण खून केल्याची घटना बुधवारी (दि. १९) उघडकीस आली. या प्रकरणी शनीपेठ पोलिसांनी दोन्ही संशयितांना अटक केली आहे. यातील एका संशयितास कालच अटक करण्यास आली होती, तर दुसरा संशयितास मुंबई येथून अटक करण्यात आली आहे.

शनी मंदिराजवळ असलेल्या ओंकार वाणी यांच्या घराच्या तळमजल्यात मंगळवारी (दि. १८) मध्यरात्रीपासून प्रवीण उर्फ नितीन सुरेश माळी (वय २८, रा. सत्यम पार्क), भीमा उर्फ पंकज अशोक वाणी (वय २६, रा. विसनजीनगर) व राहूल जयराम सपकाळे (वय २३, रा. काचंननगर) हे तिघे दारू पिऊन पत्ते खेळत बसले होते. बुधवारी, पहाटे ४ वाजेच्या सुमारास भीमाने प्रवीणचा डोक्यात दगड मारून खून केला होता. त्यानंतर पंकज आणि राहूल दोघे फरार झाले होते.

दोघांना अटक

या प्रकरणातील राहूल सपकाळे याला आसोदा रस्त्यावरून अटक केली. मुख्य संशयीत पंकज हा बुधवारी पहाटे घरी गेला. त्याने त्याच्या आई भुसावळ येथे गेला. त्यानंतर जळगावला न थांबणाऱ्या एका एक्स्प्रेस रेल्वेने मुंबईकडे पसार झाला. बुधवारी, दुपारी २ वाजेच्या सुमारास तो कल्याण येथे रेल्वेतून उतरला. कल्याणला जेवण केले. त्यानंतर तो छत्रपती शिवाजी टर्मिनसला गेला. त्याठिकाणी जुन्या मित्रांना भेटला. पोलिसांना तो मुंबईत असल्याची त्याची माहिती मिळाली. पथक तात्काळ मुंबईला रवाना झाले. त्याला बुधवारी रात्री १० वाजेच्या सुमारात सीएसटी रेल्वे स्थानकात ताब्यात घेतले. दोघांना गुरुवारी (दि. २०) न्यायाधीश गोरे यांच्या न्यायालयात हजर केले असता त्यांनी २३ एप्रिलपर्यंत पोलिस कोठडी सुनावली आहे.

डम्परचालकास जामीन

हितवर्धिनी सोसायटीत बुधवारी (दि. २०) सकाळी ७.१० वाजता दक्ष उर्फ देवांश कैलास वाणी-भदाणे (वय ३) हा काकांसोबत कचरा टाकून परत घराकडे येत असताना चंदूअण्णा नगराकडून भरधाव येणाऱ्या वाळूच्या डंपरने (क्रमांक एमएच-१९-वाय-३७५७) त्याला चिरडले होते. याप्रकरणी तालुका पोलिस ठाण्यात डंपर चालक दीपक सखाराम नन्नवरे (वय ३०, रा. निमखेडी) याच्याविरोधात गुन्हा दाखल करण्यात आला होता. गुरुवारी न्यायालयात हजर केले असता त्यांनी न्यायालयीन कोठडी सुनावली.