गणेशपुरीत घरफोडी; ५३ हजार लंपास

म. टा. प्रतिनिधी, जळगाव

मेहरूण परिसरातील गणेशपुरी येथील रहिवासी नफिसा नाहीद देशमुख मुंबईला गेल्या असताना बुधवारी (दि. २३) त्यांच्या बंद घराचे कुलुप तोडून चोरट्यांनी घरातील कपाटामधून सुमारे ५३ हजार ६०० रुपयांचा ऐवज चोरून नेला आहे.

नफिसा देशमुख ह्या मेहरूण येथील गणेशपुरी येथे राहतात. गेल्या दहा ते पंधरा दिवसांपासून त्या मुंबई येथे नोकरीस असलेली मुलगी रूही देशमुख हिला भेटण्यासाठी गेलेल्या आहेत. त्यामुळे घरी कुणीही नव्हते. साफसफाईसाठी मुन्नीबी महमंद शरीफ ही महिला देशमुख यांच्या घरी रोज ये-जा करीत असते. घर बंद असल्याचे हेरून चोरट्यांनी देशमुख यांच्या घराच्या दराचे कडी-कोंडा तोडून कपाटातील दागिने तसेच रोकड असे एकूण ५३ हजार ६००रुपयांचा ऐवज चोरून नेला.

बुधवारी (दि. २३) सकाळी देशमुख यांच्या घरी कुरीअर आले होते. ते आल्याने शेजारी राहणार्‍या सुलोचना रवींद्र पाटील यांनी नफिसा देशमुख यांना फोन करून तुम्ही घरी आले आहेत का? कुरीअरवाला आला आहे. देशमुख यांनी घरी नसल्याचे सांगितल्यानंतर सुलोचना पाटील यांनी घराचे दार तर उघडे आहे, अशी माहिती दिली. यानंतर सुलोचना पाटील यांनी हाजी शेख अशरफ शेख शौकत यांना बोलवून घर पाहिले. त्यावेळी त्यांना घरात चोरी झाल्याचे समजताच त्यांनी देशमुख यांना कळविले.

देशमुख यांनी त्यांच्या ओळखीचे वकील रहिम शेख मोहमंद पिंजारी यांना घरी जावून पाहणी करण्यासाठी सांगितले. अ‍ॅड. पिंजारी यांनी देशमुख यांच्या घरी येवून पाहणी केली असता घराचे कडी-कोंडा तुटलेले दिसले. घरात प्रवेश केल्यानंतर लाकडी कपाट फोडलेले आढळून आले व त्यातील ५० हजार रुपये किमतीच्या सोन्याच्या १० ग्रॅम वजनाच्या २ अंगठ्या, ३ ग्रॅम वजनाचे टॉप्स तसेच २ हजार रुपयांची रोकड व १ हजार ६०० रुपयांची चिल्लर असा ऐवज चोरीला गेल्याचे निष्पन्न झाले. अ‍ॅड. पिंजारी यांनी एमआयडीसी पोलिस ठाण्यात दिलेल्या फिर्यादीवरून चोरट्यांविरूध्द एमआयडीसी पोलिस ठाण्यात गुन्हा दाखल करण्यात आला आहे.