मुलीची छेड काढून कुटुंबियांना मारहाण

म. टा. प्रतिनिधी, जळगाव

शहरातील हरीविठ्ठल नगर भागात एका तरुणाने शेजारी राहणाऱ्या एका चौदावर्षीय अल्पवयीन मुलीची छेड काढत तिच्या वडील व काकांना मारहाण केली. शनिवारी (दि. ४) पहाटे ही घटना घडली. याप्रकरणी रामानंद पोलिसात गुन्हा दाखल करण्यात आला असून, तरुणाला अटक करण्यात आली आहे.

सागर भोई हा गेल्या सहा महिन्यांपासून संबंधित मुलीची छेड काढतो आहे. शुक्रवारी दुपारी ४ वाजता मुलीच्या घरी कोणी नसल्याची संधी साधून त्याने घरात घुसून तिची छेड काढली. कोणाला सांगितले तर मारून टाकेल, खून करेल अशी धमकी त्याने दिली होती. पीडित मुलीने आपल्या काकांना आवाज दिल्यामुळे सागर भोईने तेथून पळ काढला होता. त्यानंतर शनिवारी पहाटे ५ वाजता भोई पुन्हा एकदा दारू पिऊन मुलीच्या घराबाहेर आला. सागरने शिवीगाळ करीत तिच्या कुटुंबीयांना जागे केले. मुलीची छेड काढून तिच्या वडील व काका यांना मारहाण केली. पीडित मुलीचे रामानंद नगर पोलिस ठाणे गाठून फिर्याद दिली.

सुप्रीम कॉलनीत विवाहितेचा विनयभंग

घरात झोपलेल्या विवाहित महिलेचा विनयभंग झाल्याची घटना शुक्रवारी (दि. ३) रात्री ९.३० वाजता सुप्रीम कॉलनी परिसरात घडली. याप्रकरणी एमआयडीसी पोलिस ठाण्यात गुन्हा दाखल करण्यात आला असून, संशयित टवाळखोराला अटक करण्यात आली आहे. सुप्रीम कॉलनी येथील २७ वर्षीय महिला मुलांसह घरात झोपलेली असताना परिसरातच राहणाऱ्या आसिफ शेख जहुर (वय २२) या टवाळखोराने घरात घुसून तिचा विनयभंग केला.