संशयिताचा हॉस्पिटलमध्ये मृत्यू

म. टा. प्रतिनिधी, जळगाव

कापूस चोरीच्या गुन्ह्यात धरणगाव पोलिसांनी अटक केलेल्या संशयिताचा पोलिस कोठडीत असताना सिव्हिल हॉस्पिटलमध्ये उपचार घेताना मृत्यू झाला. ही घटना सोमवारी (दि. ६) सकाळी घडली. संतोष बंडू भील (वय ४८ रा. वराड, ता. धरणगाव) असे मृत संशयिताचे नाव आहे. वराड गावातील चार जणांनी तसेच अटक केल्यानंतर पोलिसांनी मारहाण केल्यानेच त्याचा मृत्यू झाल्याचा आरोप नातेवाईकांनी केल्याने सिव्हिल हॉस्पिटलमध्ये तणाव निर्माण झाला होता. गुन्ह्याचा तपास सीआयडीकडे सोपविण्यात आला आहे.

गावातील एका शेतातून संतोष भील याने कापूस चोरल्याच्या संशयावरून दि. २७ ऑक्टोबरला सायंकाळी साडे सात वाजता वराड गावाजवळ महामार्गावर गावातील चार जणांनी त्याला बेदम मारहाण केली होती, त्यात तो बेशुद्ध पडला. हा प्रकार समजल्यानंतर संतोषचा पुतण्या अनिल सोनवणे व संजय बागूल हे घटनास्थळी गेले असता तेथे २० ते २५ जण होते तर संतोष बेशुद्ध पडला होता. सोनवणे व बागुल यांनी त्याला धरणगाव येथे ग्रामीण रुग्णालयात दाखल केले. तेथे तीन दिवस उपचार केल्यानंतर संतोष याची सुटका झाली होती. प्रकृती अधिक खालावल्याने त्याला रविवारी (दि. ५) नोव्हेंबरला सकाळी पावणे अकरा वाजता जिल्हा रुग्णालयातील अतिदक्षता विभागात दाखल केले. उपचार सुरू असताना सोमवारी (दि. ६) सकाळी ८.५० वाजता मृत्यू झाला. संतोष भिल याच्या पश्चात दिव्यांग आई, पत्नी, दोन मुलगे, दोन मुली असा परिवार आहे. संतोष याच्या मृत्यू गावातील चौघांनी व पोलिसांनी केलेल्या मारहाणीमुळे झाला. त्यांची चौकशी करून अॅट्रॉसिटी कायद्याखाली कठोर कारवाई करावी.