पॉलिशच्या नावाने बांगड्यांची चोरी

म. टा. प्रतिनिधी, जळगाव

शहरातील मुक्ताईनगरात राहणाऱ्या एक वृद्धेच्या घरात सेल्समन सांगून आलेल्या दोघांनी पितळी भांडी पॉलिश करून देण्याचे सांगत प्रवेश केला. घरात असलेल्या पती आणि मुलाने वृद्धेला सावध केले. दोघांच्या सल्ल्याकडे दुर्लक्ष करीत घेतलेल्या निर्णयामुळे वृद्धेला ३८ ग्रॅम वजनाच्या सोन्याच्या बांगड्या गमवाव्या लागल्या आहेत.

जिल्हा उपनिबंधक कार्यालयातून सेवानिवृत्त झालेले गोविंद चौधरी यांचे मुक्ताईनगरात घर आहे. बुधवारी (दि. ९) सकाळी ते पत्नी इंदूबाई व मुलगा अनिल यांच्यासोबत घरी होते. सूट-बूट घातलेला एका भामटा त्यांच्या घरी सेल्समन्स म्हणून आला. त्याने पितळाची भांडी स्वच्छ करण्याची पावडर विक्रीस आणल्याचे इंदूबाई चौधरी यांना सांगितले. त्यानुसार इंदूबाई यांनी देवघरातील काही देवांच्या मूर्ती, भांडी स्वच्छ करण्याचे प्रात्यक्षिक त्याच्याकडून करून घेतले. इंदुबाई यांना मुलगा अनिल यांनी ही पावडर विकत घेऊ नको, यांना घरातून जाऊ दे. असा सल्ला आईस दिला. त्यानंतर अनिल हे घरातून निघून गेले. ते बाहेर जाताच भामट्याचा एका साथीदारदेखील घरात आला. सोन्याचे दागिनेदेखील पॉलिश करून देतो, असे एका भामट्याने इंदूबाई यांना सांगितले. त्यानुसार इंदूबाई यांनी हातातील ३८ ग्रॅम वजनाच्या ८४ हजार रुपये किमतीच्या सोन्याच्या चार बांगड्या काढून भामट्याकडे दिल्या. एका भांड्यात पाणी घेऊन त्यात पावडर व हळद टाकून त्यात बांगड्या टाकल्याचा बनाव भामट्याने केला. काही वेळानंतर यातून बांगड्या काढण्याचा सल्ला देत दोन्ही भामट्यांनी चौधरी यांच्या घरातून काढता पाय घेतला. १५-२० मिनीटांनी इंदूबाई यांनी भांड्यातील बांगड्या काढण्याचा प्रयत्न केला असता त्यात काहीच नसल्याचे त्यांच्या लक्षात आले. दरम्यान, चौधरी यांच्या घराशेजारी असलेल्या दुमजली इमारतीच्या वरच्या मजल्यावर सीसीटीव्ही कॅमेरे बसवलेले आहेत. या कॅमेऱ्यात एक भामटा कैद झाला असून, तर दुसरा भामटा काही अंतरावर दुचाकी घेऊन उभा होता.