सासरच्यांकडून मारहाण; विवाहितेचा गर्भपात

म. टा. प्रतिनिधी, जळगाव

फ्लॅट घेण्यासाठी माहेरून १० लाख रुपये आणावे यासाठी सासरच्या लोकांनी विवाहितेला केलेल्या मारहाणीत विवाहितेचा गर्भपात झाला. या प्रकरणी विवाहितेच्या फिर्यादीवरून पतीसह सासू-सासऱ्यांविरुद्ध शहर पोलिसात गुन्हा दाखल करण्यात आला आहे.

शिवाजीनगरात राहणाऱ्या २३ वर्षीय महिलेचा मुक्ताईनगर येथील कश्यफ्फूर रहेमान यांच्याशी विवाह झाला होता. विवाहानंतर जून २०१७ पासून सासरच्या मंडळीकडून विवाहितेचा छळ करण्यात येत होता. हैद्राबाद येथे फ्लॅट घेण्यासाठी १० लाख रुपये आणले नाही म्हणून तिला जिवे ठार मारण्याची धमकी दिली. तसेच विवाहितेच्या पोटावर व पाठीवर मारहाण केल्याने तिचा गर्भपात झाला. तिच्या अंगावरील जवळपास २ लाखांचे दागिने काढून तिला घराबाहेर हाकलून दिले. अशा आशयाच्या फिर्यादीवरून पती कश्यफ्फूर रहेमान, सासरे शफीफूर रहेमान, सासू सईदाबी रहेमान या तिघांविरुद्ध गुन्हा नोंदविण्यात आला असून, तपास पीएसआय महेश जानकर करीत आहे.

‘मविप्र’तील हाणामारीप्रकरणी जामीन

जळगाव जिल्हा मराठा विद्याप्रसारक संस्थेत ताबा घेण्यावरून पाटील व भोईटे गटात झालेल्या हाणामारीप्रकरणी परस्पराविरुद्ध जिल्हापेठ पोलिसात गुन्हे दाखल करण्यात आला होता. दरम्यान, या गुन्ह्यातील संशयित नगरसेविका अश्‍विनी देशमुख, विनोद देशमुख, संजय पवार, सोनल पवार, अॅड. भरत पाटील व भालेराव साठे या सहा जणांना अटकपूर्व जामीन मिळावा यासाठी न्यायालयात अर्ज दाखल केला होता. त्यामध्ये या सहाही जणांना दि. ११ जुलैपर्यंत अंतरिम अटकपूर्व जामीन देण्यात आला आहे. तसेच दि. ११ जुलै रोजी सर्व अर्जदारांना उपस्थित राहण्याचे निर्देश न्या. पी. वाय. लाडेकर यांनी दिले आहे. सरकारपक्षातर्फे अॅड. पंढरीनाथ चौधरी यांनी कामकाज पाहिले.