विद्यार्थिनीची छेड; विनयभंगाचा गुन्हा

म. टा. प्रतिनिधी, जळगाव

गेल्या पंधरा दिवसांपासून दोन शाळकरी विद्यार्थिनींचा खासगी क्लासपर्यंत दोघा रोडरोमियो पाठलाग करीत होते. त्यांना मंगळवारी विद्यार्थिनींच्या पालकांनी पकडून चोप दिला. दोघांना जिल्हा पेठ पोलिसांच्या स्वाधीन करून त्यांच्याविरुद्ध विनयभंगाचा गुन्हा दाखल करण्यात आला आहे.

गणेश कॉलनीतील अल्पवयीन विद्यार्थिनी मैत्रिणीसह परिसरातील खासगी क्लासमध्ये जात असताना गेल्या १५ दिवसांपासून दोघे अल्पवयीन तरुण दुचाकीने (एमएच. १९ बीझेड. ६२५८) या मुलींचा पाठलाग करीत होते. मुलगी क्लासमध्ये बसल्यावर रस्त्यावरून मोठ्याने गाणे म्हणून तिची छेड काढत होते. मंगळवारी सकाळी ८ वाजता मलगी क्लाससाठी घरून निघताच दोघे रोडरोमियो तिचा पाठलाग करीत क्लासपर्यंत पोहचले. मुलींनी त्यांच्या दुचाकीचा नंबर नोट करून ठेवला. यानंतर थेट आईला फोन करून माहिती दिली. क्लास सुटल्यानंतर हे तरुण तेथे पोहचताच मुलीसह तिची आई, काका व परिसरातील नागरिकांनी टवाळखोरांना पकडले.

नियम मोडणाऱ्या ५० रिक्षाचालकांवर कारवाई
जळगाव : प्रवासी वाहतूक करीत असलेल्या नियम मोडणाऱ्या रिक्षाचालकांवर मंगळवारी (दि. २५) कारवाईचा बडगा उगारण्यात आला. शहर वाहतूक शाखा व आरटीओ यांच्या संयुक्त पथकाने शहारात कारवाई करून सुमारे ५० रिक्षा वाहतूक शाखेत आणण्यात आल्या. रिक्षा चालवितांना विना क्रमांक, विना गणवेश, बॅच बिल्ला नसणे, पासिंग नसणे, परवान नसणे यासारखे नियम मोडून प्रवासी वाहतूक सुरू आहे. या नियम मोडणाऱ्या रिक्षाचालकांवर मंगळवारी कारवाईचा बडगा उगारण्यात आला. शहर वाहतूक शाखेचे पोलिस निरीक्षक सदाशिव कुनगर, आरटीओचे आर. एम. शिरसाठ, शहर वाहतूक शाखेचे फयाज शेख, विनोद पाटील, विजयसिंग पाटील, प्रकाश परदेशी, राजु मोरे, सोपान पाटील, मुजफ्फर सैय्यद, सुशील चौधरी, सुनील सोनवणे आदींच्या पथकाने शहरातील रेल्वे स्थानक, नेहरू चौक, टॉवर चौक, कोर्ट चौक येथे एकाच वेळी कारवाईस सुरुवात केली.