बनावट ई-मेल करून तरुणाची फसवणूक

म. टा. प्रतिनिधी, जळगाव

तरुणास बँकेत नोकरी मिळवून देण्यासाठी बनावट ई-मेल तयार करून भामट्याने त्याची ९३ हजार रुपयांत फसवणूक केल्याचा प्रकार समोर आला आहे.

सचिन संजय मराठे (वय २५, रा. म्हसावद, ता. जळगाव) हा खासगी कंपनीत नोकरीस आहे. त्याच्या ई-मेल आयडीवर बनावट मेल पाठवून त्याला एचडीएफसी बँकेत नोकरी लावून देण्याचे आमीष दिले. त्यानंतर या भामट्यांनी दि. २२ ऑगस्ट ते २२ ऑक्टोबर २०१८ दरम्यान, सचिनला वेगवेगळ्या नंबरवरून फोन करून नोकरीची माहिती दिली. नोकरीने आमीष दिल्यानंतर अज्ञात व्यक्तीने वेगवेगळ्या कारणांनी सचिनकडून एकूण ९३ हजार रुपये घेतले. यानंतर त्यांनी संपर्क बंद केला. फसवणूक होत असल्याचे लक्षात आल्यानंतर सचिनने सायबर क्राईम पोलिस ठाण्यात जाऊन फिर्याद दिली. त्यानुसार गुन्हा दाखल करण्यात आला आहे.

पिस्तूल चोरीबाबत अट्टल गुन्हेगारांची तपासणी
जिल्हा पोलिस दलाच्या शस्त्र प्रदर्शनातून पिस्तूल चोरी झाली. या पिस्तूलचा शोध घेण्यासाठी पोलिसांनी शुक्रवारी रात्रभरात अट्टल गुन्हेगारांची तपासणी करून देखील उपयोग झालेला नाही. शुक्रवारी दिवसभरात या प्रदर्शनास भेट देणाऱ्या शाळा, महाविद्यालयांतर्फे करण्यात आलेले व्हिडीओ शुटिंग व फोटो पोलिसांनी शनिवारी ताब्यात घेतले. त्यांची काटेकोर पाहणी करून संशयिताचा शोध सुरू करण्यात आला आहे. कोणी विद्यार्थ्याने नजरचुकीने पिस्तूल नेले असल्याचाही कयास लावला जात आहे.