विद्यार्थिनीचे अपहरण; आतेभावाविरुद्ध गुन्हा

म. टा. प्रतिनिधी, जळगाव

शाळेतील अल्पवयीन आतेबहिणीचे अपहरण एका तरुणाने केल्यामुळे शहरात खळबळ उडाली आहे. याप्रकरणी आकाश रतन बोदडे याच्याविरोधात गुन्हा नोंदवण्यात आला आहे. १४ जून रोजी शाळेतून घरी न परतलेल्या मुलीचा शोध घेतला असता ती मिळून आली नाही. त्यामुळे बुधवारी मुलीच्या आईने शहर पोलिसांत तक्रार दाखल केली.

एक्स्प्रेसमधून धूर

लोकमान्य टिळक टर्मिनस फैजाबाद साकेत एक्स्प्रेस ही गाडी बुधवारी भुसावळ रेल्वे स्थानकावर १२.३७ वाजता येत असताना दगडी पुलाजवळ इंजिनपासून सातव्या क्रमांकाच्या बोगीतील डायनेमो बेल्टमधून धूर निघायला लागला. हा कोच क्र. सीआर ००४५६ जीएससीएन गाडीपासून वेगळा करण्यात येऊन दुरूस्त करण्यात आला.

वाढीव कोठडी

जळगाव तालुक्यातील आव्हाणे गावी पूर्ववैमनस्य व शेतात बकरी व गुरे चरायला नेल्याच्या कारणावरून दोन गटात वाद होऊन हाणामारी झाल्याची घटना घडली होती. याप्रकरणी तालुका पोलिसात अ‍ॅट्रॉसिटी व दंगलीचा गुन्हा दाखल झाला होता. बुधवारी दंगलीच्या गुन्ह्यातील दोन संशयितांची पोलिस कोठडी संपली. त्यांना न्यायाधीश एम. एम. चौधरी यांच्या न्यायालयात हजर केले असता दोघा संशयितांना दोन दिवसांची वाढीव पोलिस कोठडी सुनावली आहे.