धूम स्टाइलने लांबविली मंगळपोत

म. टा. प्रतिनिधी, जळगाव

सकाळच्या सुमारास दूध घेण्यासाठी जात असलेल्या महिलेच्या गळ्यातून भरधाव मोटारसायकलवर आलेल्या दोघा तरुणांनी मंगळसूत्र लांबविल्याची घटना शनिवारी (दि. १६) सकाळी साडेसात वाजता घडली.

शहरातील महाबळ भागातील त्र्यंबक नगरातील रहिवासी वंदना बापू नेरकर या सकाळी नेहमीप्रमाणे दूध घेण्यासाठी जात होत्या. दरम्यान, मागून मोटारसायकलवर आलेल्या दोन मोटारसायकस्वारांनी वंदना नेरकर यांच्या गळ्यातील २० हजार रुपये किमतीचे मंगळसूत्र जबरीने ओढून नेले. मोटारसायकलवर आलेल्या चोरट्यांपैकी मागे बसलेल्या चोरट्याने पिवळा रंगाचा टी-शर्ट परिधान केला होता. चोरट्यांनी मंगळसूत्र ओढताच वंदना नेरकर यांनी आरडाओरड केली. परंतु, सकाळच्या सुमारास या भागात नागरिकांची वर्दळ कमी असल्याने चोरटे पसार होण्यात यशस्वी ठरले. या प्रकरणी वंदना नेरकर यांच्या फिर्यादीवरून रामानंद पोलिसात अज्ञात चोरट्यांविरुद्ध गुन्हा दाखल करण्यात आला आहे.

मृतदेहाची ओळख पटली
नवीन बसस्थानकात शुक्रवारी मृतावस्थेत आढळून आलेल्या व्यक्तीची ओळख पटली आहे. मृत झालेल्या तरुण हा वरणगाव येथील असल्याचे निष्पन्न झाले आहे. नवीन बसस्थानकाच्य आवारातील अन्नपूर्णा रेस्टॉरंटच्या भिंतीजवळ शुक्रवारी सायंकाळच्या सुमारास एका व्यक्तीचा मृतदेह आढळून आला होता. नागेश भाईदास बैरागी असे त्या व्यक्तीचे नाव असून, नागेश यांना दारूचे व्यसन असल्याने ते घरातून निघून गेले होते. तसेच बसस्थानकाच्या आवारात मिळेल ते काम करुन ते त्याच ठिकाणी राहत होते. अतिमद्यसेवनाने त्यांचा मृत्यू झाला असून, तपासधिकारी यांनी त्यांचा फोटो व्हॉटस् अॅप ग्रुपवर व्हायरल केला होता. त्यानुसार नागेश बैरागी यांच्या वहिनी सीमा बैरागी यांनी त्यांची ओळख पटविली.

शिक्षकाविरुद्ध गुन्हा
शाळा प्रवेशोत्सवाच्या पहिल्या दिवशी शाळेतील शिक्षकांनी लाठी शाळेच्या आवारात काही मंडळी जमवून त्यांच्याकडून मुख्यगेटवर असलेले सुरक्षारक्षक नारायण शिंपी यांना शिवीगाळ व धक्काबुक्की करीत मारहाण करण्यात आली. तसेच शिक्षकांकडून शिंपी यांना चेंदामेंदा करण्याची धमकीदेखील देण्यात आली. या प्रकरणी संदीप रमेश सोनवणे यांच्या फिर्यादीवरून १० शिक्षकांसह एका शिपायावर जिल्हापेठ पोलिसात गुन्हा दाखल करण्यात आला आहे. पुढील तपास पोलिस उपनिरीक्षक मनोज वाघमारे करीत आहेत. शिपायाला मारहाण केल्याप्रकरणी आर. आर. विद्यालयातील मुख्याध्यापक डी. एस. सरोदे, के. टी. सोनवणे, सुधीर महाजन, पानपाटील सर, कुमावत सर, झंवर सर, पिटे सर, डी. बी. पांढरे, वाय. जी. चौधरी, आर. भावसार यांच्यासह शिपाई जगदीश चव्हाण यांच्यावर गुन्हा दाखल करण्यात आला आहे.