जळगावातील डॉक्टर बनले तिघांसाठी देवदूत!

लडाखला दरीत उतरून जखमींवर केले उपचार

म. टा. प्रतिनिधी, जळगाव

जळगावातील तीन व भुसावळच्या दोन डाक्टरांनी सहाशे फूट खोल दरीत कार कोसळून जखमी झालेल्या पर्यटकांच्या मदतीसाठी प्राणाची बाजी लावून खोल दरीत उडी घेतली. जखमी दोन पोलिसांसह तीन जणांवर प्रथमोपचार करीत या आरोग्यदूतांनी त्यांना जीवदान दिले. यात एका पर्यटकाचा मृत्यू झाला तर तिघांना वेळीच उपचार मिळाल्याने त्यांचा जीव वाचला.

लेह-लडाख येथे जळगाव येथील डॉ. नितीन खडसे, डॉ. धीरज चौधरी, डॉ. दीपक पाटील व सीए. कपिल पाटील तसेच भुसावळ येथील डॉ. विरेंद्र झांबरे, डॉ. नीलेश चौधरी हे पर्यटनासाठी गेले होते. दुर्गम भागात फिरत असताना या डॉक्टर चमूला लेहपासून शंभर किलोमीटर अंतरावरील तांगलाला पास भागात सोळा हजार पाचशे फूट उंचावर असलेल्या ठिकाणी एक कार सहाशे मीटर खोल दरीत कोसळलेली दिसली. डॉक्टर चमूजवळ उपचाराचे सर्व साहित्य असल्याने आपल्या वैद्यकीय सेवेचे भान राखत पाचही आरोग्यदूतांनी या अतिदुर्गम खोल दरीत औषधांसह स्वत:ला झोकून दिले. कारजवळ पोहचताच सहा जणांपैकी एका मुलीचा जागेवरच मृत्यू झाल्याचे त्यांच्या लक्षात आले. तर दोघांना किरकोळ दुखापत झाली होती. मात्र, इंडो तिबेटियन बॉर्डरचे दोन पोलिस व मुंबईची एक मुलगी जखमी झाली होती. पंजाबमधील पासिंग असलेल्या या अपघातग्रस्त कारमधील अत्यवस्थ रुग्णांवर या डॉक्टरांनी त्यांच्याजवळील साहित्याच्या साहाय्याने उपचार करीत त्यांचे प्राण वाचविले.

कृत्रिम श्वासोश्वासाची मदत
उंचावर असलेल्या व बर्फवृष्टी होणाऱ्या या भागात ऑक्सिजनचे प्रमाणही कमी होते. त्यामुळे जखमींनाही ऑक्सिजनची गरज असल्याचे लक्षात येताच या डॉक्टरांनी कृत्रिम श्वासोश्वास देत ट्रकद्वारे १० किलोमीटरपर्यंत नेले. त्यानंतर रुग्णवाहिकेद्वारे खारू येथे मिलिटरी हॉस्पिटल येथे दाखल केले. वेळीच मिळालेल्या उपचारामुळे दोन पोलिसांसह मुंबईतील एका मुलीला जीवदान मिळाले.