गांधी उद्यानास गती!

नूतन महापौर ललित कोल्हेंकडून पाहणी; २ ऑक्टोबरला लोकार्पण

म. टा. प्रतिनिधी, जळगाव

जळगाव शहराचे नूतन महापौर ललित कोल्हे यांनी पदभार सांभाळल्यानंतर लगेचच शहरातील विविध कामांबाबत गीत देण्याचे संकेत दिले आहे. शनिवारी (दि. ९) महापौरांनी शहरातील गांधी उद्यानाच्या कामाची पाहणी केली. या उद्यानात ८०० मीटरच्या ट्रॅकसह, लॉनचे बेट विकसित केले जात असल्याचे कोल्हे यांनी सांगितले.

येत्या २ ऑक्टोबरला महात्मा गांधी जयंतीला या अद्ययावत उद्यानाचे लोकार्पण होणार असल्याची माहितीही महापौरांनी यावेळी दिली. पद्मश्री डॉ. भवरलाल जैन थीम पार्कच्या उभारणीनंतर जैन समुहाने महापालिकेच्या महात्मा गांधी उद्यान विकसित करून देण्यासाठी पुढाकार घेतला आहे. गेल्या महिन्यापासून महात्मा गांधी उद्यानाचा कायापालट करण्याचे काम युद्धपातळीवर सुरू आहे.

शनिवारी नूतन महापौर ललित कोल्हे यांनी महात्मा गांधी उद्यानात जावून कामांची पाहणी केली. त्यांनी कामाबाबत काही सूचनाही अभियंत्यांना दिल्या. तसेच उद्यानाच्या कामाची माहिती जाणून घेतली. यावेळी त्यांच्यासोबत माजी उपमहापौर सुनील महाजन, नगरसेवक अनंत जोशी उपस्थित होते. महात्मा गांधी जयंतीदिनी लोकार्पण असल्याने कामाला गती आल्याचे त्यांनी पत्रकारांशी बोलताना सांगितले.

लोकसहभागातून काम

यासह केशव स्मृती प्रतिष्ठानाकडून आकाशवाणी चौक व त्या जवळील वैद्य चौकाच्या सुशोभीकरणास देखिल लवकरच सुरुवात होणार आहे. त्यापाठोपाठ लोकसहभागातून कालंका माता मंदिर चौकाचादेखील कायापालट करण्यात येणार असल्याची माहिती महापौर कोल्हे यांनी दिली. महापालिका प्रशासनाने जळगावकरांसाठी शहरातील उद्यानाचा विकास करण्याचा निर्णय घेतला आहे. महापालिकेचे इतर उद्यानेदेखील लोकसहभागातून विकसित करण्यात येत असल्याचे महापौर ललित कोल्हे म्हणाले.

आता गांधी रिसर्च फाउंडेशन व जैन समुहाकडून मध्यवर्ती परिसरात असलेल्या महात्मा गांधी उद्यानाचा विकास करण्यात येत आहे. वास्तुविशारद शिरीष बर्वे यांनी यांनीच या उद्यानाच्या विकासाचे डिझाइन तयार केले आहे.