‘दंडुके’शाहीविरुद्ध संताप

म. टा. प्रतिनिधी, जळगाव

महापालिकेकडून मध्यवर्ती बाजारपेठेतील नो हॉकर्स झोनमध्ये गेल्या काही दिवसांपासून हॉकर्सविरुद्ध धडक अतिक्रमण मोहीम सुरू आहे. नुकत्याच अतिक्रमण निर्मूलन विभागातील कर्मचाऱ्यांना महापालिका प्रशासनाने काठ्यावाटप केल्याने हॉकर्स संतप्त झाले. त्यामुळे शनिवारी (दि. १६) चौबे शाळेत कार्यक्रमास आलेल्या आमदार सुरेश भोळे यांना त्यांनी घेराव घालत अतिक्रमण निर्मूलन विभागाच्या अतिरेकीपणाविरुद्ध संताप व्यक्त केला.

शहरातील बळीराम पेठ, सुभाष चौक, शिवाजी रोडवरील हॉकर्सला स्थलांतरीत करण्यासाठी गेल्या काही दिवसांपासून महापालिका प्रशासनाकडून प्रयत्न सुरू आहेत. त्यात सुरुवातीला सुभाष चौकातील हॉकर्सना न्यू. बी. जे. मार्केट परिसरातील पर्यायी जागेवर स्थलांतरीत करण्यात आले होते. परंतु, ते पर्यायी जागेवर व्यवसाय न करता मूळ जागेवरच व्यवसाय सुरू करायला लागले. दरम्यान, बळीराम पेठ, सुभाष चौक, शिवाजी रोड व टॉवर रस्त्यावरील हॉकर्सला ख्वॉजामियॉ झोपडपट्टीच्या जागेवर तात्पुरत्या स्वरुपात स्थलांतरीत करण्याबाबत महासभेने ठराव केला, त्यानुसार झोपडपट्टीच्या जागेवर जेसीबीच्या साह्याने

सपाटीकरण करण्यात आले.

त्यानंतर लॉटस पाडून अतिक्रमण निर्मूलन विभागाने या भागातील विक्रेत्यांचे स्थलांतरही केले. मात्र भाजीपाला विक्रेते पुन्हा याच जागेवर व्यवसाय करीत होते. त्यामुळे प्रभारी आयुक्त तथा जिल्हाधिकारी किशोर राजे निंबाळकर यांच्या आदेशाने सोमवारपासून १५ दिवसांसाठी धडक मोहीम सुरू केली आहे. गणेश कॉलनी परिसरात अतिक्रमण काढताना मनपा कर्मचारी शांताराम विठ्ठल सोनवणे यांच्या पायात लोखंडी सळई घुसल्याने ते जखमी झाले. त्यांच्यावर खासगी रुग्णालयात उपचार सुरू आहेत.

लाठ्या दिल्याने हॉकर्स संतप्त

या धडक मोहिमेत अतिक्रमण निर्मूलन विभागासह सर्व विभागांचे विभागप्रमुखही सहभागी झाले आहेत. त्यांनी बळीराम पेठ, सुभाष चौक, शिवाजी रोड, शनीपेठ या भागात हॉकर्स कारवाई होत असल्याने दररोज पथक व विक्रेत्यांची जप्तीमुळे धावपळ व किरकोळ वादही नित्याचेच झाले आहेत. अतिक्रमण निर्मूलन विभागातील कर्मचाऱ्यांना सुरक्षिततेच्या दृष्टीने प्रशासनाने नुकत्याच लाठ्या वाटप केल्या. यामुळे हॉकर्स संतप्त झाले असून, हॉकर्सला मारण्यासाठी या काठ्या दिल्याचा आरोप हॉकर्सनी केला आहे.