महाशिवरात्रीनिमित्त सजली मंदिरे

म. टा. प्रतिनिधी, जळगाव

महाशिवरात्रीनिमित्त जिल्ह्यात शिवभक्तांचा आनंद द्विगुणीत झाला असून, महाशिवरात्रीच्या पूर्वसंध्येला सोमवारी (दि. १२) शहरातील शंकराच्या मंदिरांची रंगरंगोटी, सजावट, विद्युत रोषणाई आदी कामे पूर्ण झाली होती.

शहरातील शिव मंदिरांमध्ये आज (दि. १३) पहाटेपासूनच अभिषेकाला प्रारंभ झालेला असेल. ओंकारेश्वर मंदिर, नवीन बसस्टॅण्डसमोरील चिमुकले राममंदिरातील महादेवाची राऊळ, गोलाणी मार्केटमागे, इंडो अमेरिकनच्या समोरील शिवमंदिर, तसेच शिवधाम मंदिरात विविध कार्यक्रमांचे आयोजन करण्यात आलेले आहे. यात रुद्राभिषेक, भस्म आरती, जलाभिषेक, सुका मेवा व हलाव्याने शिवलिंगाचा श्रृंगारदेखील करण्यात येणार आहे. उपवास असल्याने नागरिकांनी सोमवारी (दि. १२) दुपारनंतर बाजारात रताळी, केळी, बटाटे यांच्यासह उपवासाच्या पदार्थांच्या खरेदीसाठी गर्दी केली होती.

महाशिवरात्रीनिमित्त आज भजन संध्या

शहरातील शिव मंदिरांमध्ये आज (दि. १३) महाशिवरात्रीनिमित्त विविध धार्मिक कार्यक्रमांचे आयोजन करण्यात आलेले आहे. ओंकारेश्वर मंदिरासह शहरात असलेल्या विविध ठिकाणच्या शिवमंदिरांना विद्युत रोषणाईही करण्यात आलेली आहे. युवा गुरव मंडळ, युवाशक्ती फाउंडेशन व भवरलाल अँड कांताबार्इ जैन फाउंडेशन यांच्या संयुक्त विद्यमाने काव्यरत्नावली चौकात आज (दि. १२) सायंकाळी ६ ते ९.३० वाजेदरम्यान भजन संध्येचा कार्यक्रम आयोजित करण्यात आला आहे. या कार्यक्रमाचे उद्घाटन जिल्हाधिकारी किशोर राजेनिंबाळकर व माजी आमदार सुरेश जैन यांच्या हस्ते होणार आहे. या वेळी प्रमुख अतिथी म्हणून पोलिस अधीक्षक दत्तात्रय कराळे, महापौर ललीत कोल्हे, आमदार सुरेश भोळे, दलीचंद जैन, फारुख शेख, नगरसेवक अमर जैन, पोलिस उपअधीक्षक सचिन सांगळे, पोलिस निरीक्षक बी. जी. रोहोम, सचिन नारळे, ललीत चौधरी, दीपक जोशी उपस्थित राहणार आहेत. भजन संध्या खिर्डी गावातील भजनी मंडळ सादर करणार आहेत. नागरिकांनी या कार्यक्रमाचा लाभ घ्यावा, असे आवाहन युवाशक्ती फाउंडेशनतर्फे करण्यात आलेले आहे.