‘मविप्र’वर पाटील गटाचा ताबा

२००३ ते २०१७ पर्यंत फेरफार अर्ज वादांकित; पोलिस निरीक्षकांचा प्रस्ताव तहसीलदारांनी फेटाळला

म. टा. प्रतिनिधी, जळगाव

शहरातील जिल्हा मराठा विद्या प्रसारक संस्थेवर नरेंद्र पाटील यांचा गटाने तब्बल १२० दिवसांनंतर नरेंद्र पाटील यांच्या संचालक मंडळाने पुन्हा संस्थेचा ताबा घेतला. या प्रकरणी तोडगा निघण्यासाठी पोलिस निरीक्षकांनी दाखल केलेल्या प्रस्तावास तहसीलदारांनी फेटाळल्याने संस्थेवरील ताब्याचा नरेंद्र पाटील गटाचा मार्ग मोकळा झाला.

या प्रकरणी जिल्हा पेठ पोलिसांनी तहसीलदारांकडे प्रस्ताव सादर केल्यानंतर जिल्हा उपनिबंधक कार्यालयाकडून तहसीलदारांनी माहिती घेतली. त्यानुसार निवडणुकीनंतर नरेंद्र पाटील यांच्या संचालक मंडळाचा ताबा संस्थेवर असल्याचे स्पष्ट झाले. तर सहाय्यक धर्मादाय आयुक्त यांनी दिलेल्या माहितीत २००३ ते २०१८ पर्यंत फेरफार अर्ज वादांकित असून, प्रलंबित असल्याचे आढळून आले. त्यामुळे तालुका दंडाधिकाऱ्यांनी हा प्रस्ताव फेटाळून लावला. या आदेशाच्या प्रती मिळाल्यानंतर नरेंद्र पाटील गटाने संस्थेत रविवारी दुपारी १२.३० वाजता कार्यालयात प्रवेश केला. दरम्यान, भोईटे गटाचा एकाही सदस्याचा यामध्ये समावेश नसल्याने तालुका दंडाधिकाऱ्यांनी पोलिसांकडून दाखल सीआरपीसी कलम १४५ फेटाळून लावले.

जिल्हा मराठा विद्या प्रसारक संस्था ही मुंबई विश्वस्त अधिनियम १९५० नुसार वैध असल्याचा निर्णयाचा आधार घेऊन, १७ फेब्रुवारी २०१८ रोजी भोईटे गटाने संस्थेच्या कार्यालयात जाऊन ताबा घेण्याचा प्रयत्न केला होता. त्यानंतर नरेंद्र पाटील गट व भोईटे गट आमने-सामने आल्याने गोंधळाची परिस्थिती निर्माण झाली होती. या वेळी पोलिस प्रशासनाने दोन्ही गटांना संस्थेच्या कार्यालयात प्रवेशास बंदी केली होती. जळगाव जिल्हा मराठा विद्या प्रसारक सहकारी समाज मर्यादित ही संस्था दोन अधिनियमाखाली नोंदणी झाल्याने कार्यकारिणी वेगवेगळ्या असून, या दोन कार्यकारिणीचे अनेक वर्षांपासून वाद सुरूच आहेत. संस्थेच्या कार्यालयाच्या ताब्यासाठी दोन्ही गटांमध्ये झालेल्या वादामुळे कायदा व सुव्यवस्था बिघडू नये म्हणून पोलिस प्रशासनाने या संस्थेच्या कार्यालयात बंदोबस्त लावला होता.

सभासदांचा विजय
मविप्रच्या सर्व सभासदांचा हा विजय आहे, असे मत संस्थेचे अध्यक्ष नरेंद्र पाटील यांनी ‘मटा’शी बोलताना व्यक्त केले. पोलिसांनी कुठलीही नोटीस न देता संस्थेवर ताबा घेतला होता. याचेबराबर १७ फेब्रुवारी रोजी संस्थेच्या आवारात झालेल्या गोंधळाप्रकरणी पोलिसांनी गुन्हा दाखल केला नसल्याचे सांगत नरेंद्र पाटील यांनी या प्रकरणी गुन्हा दाखल करण्याची मागणी केली. या वेळी प्रतिभा शिंदे, संचालक संजय पवार, अ‍ॅड. विजय पाटील, हेमंतकुमार साळुंखे, दीपक सूर्यवंशी, विनोद देशमुख यांच्यासह सर्व संचालक मंडळाचे सदस्य उपस्थित होते. पोलिसांकडून घेण्यात आलेला ताबा हा राजकीय दबावापोटी असल्याचा आरोप अ‍ॅड. विजय पाटील यांनी केला. आज (दि. १८) पासून संस्थेचे कामकाज पूर्ववत चालणार असल्याचेही त्यांनी सांगितले.