महापौर, उपमहापौरांनी घेतली मुख्यमंत्र्यांची भेट

म. टा. प्रतिनिधी, जळगाव

महापालिकेच्या नुकत्याच झालेल्या सार्वत्रिक निवडणुकांमध्ये भाजपने सर्वाधिका जागा जिंकल्या. त्यानंतर भाजपच्या महापौर सीमा भोळे व उपमहापौरपदी डॉ. आश्विन सोनवणे यांची निवड झाली. या नूतन पदाधिकऱ्यांनी मंगळवारी मुंबई येथे मुख्यमंत्री देवेंद्र फडणवीस यांची भेट घेतली.

मुंबईत मंगळवारी जलसंपदा मंत्री गिरीश महाजन, आमदार सुरेश भोळे यांच्यासमवेत नूतन महापौर व उपमहापौर यांनी मुख्यमंत्री देवेंद्र फडणवीस, महसूलमंत्री तथा पालकमंत्री चंद्रकांत पाटील, सहकारमंत्री सुभाष देशमुख, ग्रामविकास मंत्री पंकजा मुंडे यांची सदिच्छा भेट घेतली. याप्रसंगी भाजपा गटनेते भगत बालाणी, नगरसेवक डॉ. विश्वनाथ खडके, मोहित भोळे उपस्थित होते. या वेळी नूतन पदाधिकाऱ्यांनी भाजपाचे प्रदेशाध्यक्ष रावसाहेब दानवे यांचीही भेट घेतली.

विकासकामांसाठी सहकार्य करण्याची ग्वाही
नूतन महापौर सीमा भोळे यांनी आमदार सुरेश भोळे यांच्यासोबत सोमवारी माजी मंत्री तथा शिवसेना नेते सुरेश जैन यांच्या शिवाजीनगरातील निवासस्थानी सदिच्छा भेट घेतली. या वेळी त्यांनी शहराच्या प्रलंबित प्रश्नांवरही चर्चा केली. त्यामध्ये शहराच्या विकासकामांसाठी नेहमीच सोबत राहू, अशी ग्वाही सुरेश जैन यांनी नूतन महापौरांना दिली. या भेटीत जळगाव शहरातील विकासकामे तसेच महपाालिकेच्या प्रलंबित प्रश्नांसंदर्भातही सुरेश जैन यांच्यासोबत चर्चा करण्यात आली. सुरेश जैन यांनी शहरातील विकासकामांसाठी आम्ही सकारात्मक असून, विकासकामांसाठी शिवसेना नक्कीच सहकार्य करणार असल्याची ग्वाही दिली. या वेळी नगरसेवक नितीन लढ्ढा, माजी नगरसेवक जितेंद्र मुंदडा उपस्थित होते.