बेताच्या परिस्थितीतही संकेतचे ‘नव्वदीपार’ यश!

जिन्याखाली अभ्यास करीत ९३.२० टक्के!

Pravin.chaudhari@timesgroup.com

घरची परिस्थिती बेताची. वडिलांची छोटीशी सलूनची टपरी. त्या अल्पशा मिळकतीवर संपूर्ण कुटुंबाचा उदरनिर्वाह असल्याची जाणीव अगदी लहानपणीच झाली. मुलाची हुशारी पाहून वडिलांनी भाड्याच्या घरातील जिन्याच्या खाली स्वत:च्या हाताने अभ्यासिका बनवून दिली. याच अभ्यासिकेत अभ्यास करून संकेत दगडू अहिरे याने दहावीच्या परीक्षेत ९३.२० टक्के गुण मिळवले. गरिबीचे चटके सोसलेल्या संकेतला प्रशासकीय सेवेत जायचे आहे.

हरिविठ्ठल नगर परिसरातील रुख्मिणी नगरात संकेत दगडू अहिरे आपल्या कुटुंबासह राहतो. लहानपणापासूनच घराच्या आर्थिक परिस्थितीची जाणीव असलेल्या संकेतला ही परिस्थिती बदलयाची असेल तर शिक्षणात प्रगती घेतल्याशिवाय पर्याय नसल्याची जाणीव झाली. आर्थिक परिस्थिती जेमतेम असल्याने अहिरे कुटुंब सुरुवातीपासून भाड्याच्या घरात राहत होते. मुलगा दहावीत गेल्याने त्याच्या अभ्यासाचा विचार करून पहिल्यांदाच दोन खोल्यांचे घर घेतले. या नव्या घरात आल्यावर संकेत व त्याच्या वडिलांना आवडलेली गोष्ट म्हणजे घराच्या बाहेरून गच्चीवर जाणारा जिना. मुलांच्या अभ्यासासाठी शांतता मिळावी म्हणून वडिलांनी संकेतला जिन्याखाली वस्तुंची जुळवाजुळव करीत एक टेबल करून दिला. कुठून तरी खुर्ची मिळाली. तेथे देवी स्वरस्वतीची प्रतीमा लावली आणि हीच संकेतची अभ्यासिका झाली. दहावीचा पूर्ण अभ्यास संकेतने याच ठिकाणी केला. विशेष म्हणजे, जळगावात उन्हाळ्यातील ४५ अंश सेल्सिअस तापमानात पंख्याशिवाय तासनतास बसून अभ्यास करीत हे यश त्याने मिळविले. आवडत्या गणित विषयात संकेतला १०० पैकी १०० गुण मिळाले आहेत. आता प्रशासकीय सेवेत जायचे असल्याने त्याला विज्ञान शाखेत प्रवेश घ्यायचा आहे.

..................................................

SANKET DAGDU AHIRE
संकेत दगडू अहिरे
९३.२० टक्के