आजाराला कंटाळून वृद्धाची आत्महत्या

म. टा. प्रतिनिधी, जळगाव

शहरातील ईश्वर कॉलनी परिसरात राहणाऱ्या ७५ वर्षीय वृद्धाने सोमवारी (दि. ७) सकाळी राहत्या घरात गळफास घेत आत्महत्या केली. या प्रकरणी एमआयडीसी पोलिसात नोंद करण्यात आली आहे. भावराव गिरधर सोनवणे (वय७५) असे मृत वृद्धाचे नाव आहे.

ईश्वर कॉलनी परिसरात भावराव गिरधर सोनवणे लहान मुलगा रवींद्र यांच्यासोबत राहतात. रवींद्र हा रिक्षाचालक असल्याने सोमवारी सकाळी तो नेहमीप्रमाणे शाळेच्या मुलांना सोडविण्यासाठी गेला होता. या वेळी घरातीलच एका खोलीत भावराव सोनवणे यांनी गळफास घेत आत्महत्या केली. काही वेळानंतर दरवाजा बराच वेळ न उघडल्याने कुटुंबीयांनी पाहिले असता घडलेला प्रकार लक्षात आला. भावराव यांना जिल्हा सामान्य रुग्णालयात दाखल करण्यात आले असता वैद्यकीय अधिकाऱ्यांनी मृत घोषित केले. या प्रकरणी एमआयडीसी पोलिसात नोंद करण्यात आली आहे. भावराव हे गेल्या काही दिवसांपासून आजारी होते. आजारपण आणि वृद्धापकाळामुळे त्यांनी आत्महत्या केली असावी, असा अंदाज पोलिसांनी व्यक्त केला आहे.

कानळद्यात युवकाचा गळफास
कानळदा येथील प्रशांत वसंत सपकाळे या युवकाने गळफास घेऊन आत्महत्या केल्याची घटना सोमवारी सकाळी ४ वाजेपूर्वी उघडकीस आली. याबाबत तालुका पोलिस ठाण्यात नोंद करण्यात आली असून, तपास पोलिस नाईक उमेश भांडारकर करीत आहेत. गळफासचे कारण अद्याप अस्पष्ट आहे.

तरुणाचा मृत्यू
जयवंत दशरथ महाजन (वय ३४ रा. आसोदा) हे उपचारासाठी जिल्हा सामान्य रुग्णालयात दाखल होते. उपचारा दरम्यान ११.१० वा. त्यांची प्राणज्योत मावळली. डॉ. विसपुते यांच्या खबरीवरुन तालुका पोलिस ठाण्यात आकस्मिक मृत्यूची नोंद करण्यात आली आहे.